Нилъеца гьабураб нилъееги гьабула
Нилъеца гьабураб нилъееги гьабула
Цо къоялъ бакъанида рокъове вачIунев вукIарав фермерасда рагIула кумек гьабейилан ахIулеб лъимадул гьаракь. Гьев, гьаракь рагIараб рахъалде векерула, ва гьесда вихьула хьуцI бугеб бакIалдеги ккун, хьуцIалъ жаниве цIан унев гьитIинавго вас.
Фермерас, хех гьабун, халатаб тIил балагьула ва гьеб васасухъе бегьула. Васас тIил ккола ва гьелъул кумекалдалъун хIуцIилъа къватIивеги ворчIула. Виччун цIалтарав вас битIахъе гIемер хIинкъиялъ сородилев вукIин бихьарав фермерас абула жинда цадахъ вилъайин, ретIелги хисилин кваназеги гьавилин абун. Амма вас разилъуларо, эмен дир ургъалида ватулинги абун, фермерасе баркалаги кьун, гIедегIун уна жиндирго нухда.
Нахъисеб къоялъ цIакъ чIухIараб пайтон чIола фермерасул рукъалда цебе. Пайтоналъуса къватIивеги вахъун, цо бечедго ретIа-къарав чияс гьикъула сон дир вас хвасар гьавурав чи мунищилан. Уйилан жаваб кьола фермерасги.
- Баркала буго дуе, дуца гьабураб лъикIлъи киданиги кIоченаро дида. Гьанже диеги бокьун буго дуе кумек гьабизе. Дир вас хвасар гьавуралъухъ кигIанасеб гIарац дуе кьелеб? Бокьараб къадар абе, дир рес буго дуе кумек гьабизе, - ян кIалъала бечедав чи.
- Дие щибго хIажат гьечIо, дица кумекалде хьулгун яги гIарцухъ гуро дур васги хвасар гьавурав. Дир бакIалда цоги чи вукIаравани гьесги гьабизе букIана дицаго гьабураб, - ян кIалъала фермерги.
Гьеб параялъ рокъоса къватIиве векерун вачIуна фермерасул гьитIинав вас ва чIемгIаялда тIадги рекIун, гьеб къиркъидизабизе лъугьуна.
- Гьав гьитIинав бахIарчи дурищ, - ян цIехола бечедас, васасде кверги битIун.
Васасул бетIералда кверги бахъулаго, гьесдаса бугеб рохелги загьир гьабулаго, уйилан жаваб кьола фермерасги.
- Гьедин батани дир рес буго дур вас Лондоналде вачине ва бищун лъикIаб школалде витIизе. Дуца ургъел гьабуге, цIалухъ кьезе кколебщинаб гIарацги дица дидего тIаде босула. Щиб лъалеб, гьесул дунялалдаго цIар рагIарав, халкъалъе пайдаяв чи вахъинеги бегьула. Гьедин гьабуни я дур я дир ракI бухIизеги гьечIо, - ян абула бечедас.
Гьелдаса нахъе уна саламаталго сонал. Фермерасул васас лъугIизабула цин школа ва хадуб медицинаялъул институт. КватIичIогойин абуни, тIоцебе пенициллин абураб дару ургъарав чи хIисабалда, дунялалдаго цIар рагIарав гIалимчилъунги вахъуна гьев. Гьесда цIарги букIана Александр Флемминг.
Дунялалъул кIиабилеб рагъ байбихьилалде цересел соназ захIматго унтарав чи ккола больницаялде. Гьев вукIуна фермерас хвасар гьавун вукIарав дов вас. А. Флеммингица ургъараб пенициллиналъул кумекалдалъун гьев сахлъула. Гьевин абуни кколаан Рандольф Черчелил вас, хадуб нахъа Англиялъул премьер-министрлъун вахъарав Уистон Черчиль.
Цо пуланаб данделъиялда кIалъалаго Уинстон Черчилица абуна: «Нилъеца чияе гьабураб лъикIлъи, кида-къадги нилъехъего тIадбуссун бачIинчIого чIоларо», - ян.
