Аманатлъун кьурал лъимал

Эбел, дида бице бищун хирияб,
Асар кинаб бугеб дуе ракьалда?
Кинаб гьаркьидалъун гьаб дунялалда,
Рогьунеб дуниял, роцIунеб гIумру.
Бице, дида эбел, дуе бокьулеб,
Гьуинаб махI кинаб гьаб гIумруялда?
Лъил къисмат битIидал, дур къисматалъул
Къварилъи кIочонеб гьеб дур рекIеда?!
Хирияй, ракьалда лъимергIан тIокIаб,
Асар бижун гьечIо Аллагьас дие.
Гьезул гьаркьидаса хIажатаб гьаракь,
Дида батун гьечIо гьаб дунялалда.
ЛъимергIан гьуинаб махIго лъаларо,
Гьездаса кIудияб нигIмат лъаларо.
Гьезул къисматалда хIур кIутIичIони,
Дирго къисматалъул бакIлъи лъаларо. 
Лъимеран ахIараб ахIуца гIадин,
Гьаб дир кереналда цIа рекIунаро.
Ракъи – къеч лъалареб рекIел пашманлъи,
Гьел рихьун гурони дир чучуларо.
ЦIуне, Аллагь дуца, ракьалда лъимал,
Дуца аманатлъун нижее кьурал.
Чвахизе биччаге бадиса магIу,
Наслабазул рухIел рекIедаги хъван.

ПатIимат ГIабдулаева