КIудиял мунагьал
МацIихъанлъи гьаби ккола цо чияс абураб жо цогидасда бицин, гьелъ жинда бицарав чиясул жиндаса бицарав чиясдехун дагьабниги рокьукълъи, ракIхвей бижизабулеб бугони. Къуръаналда мацIихъан какун вуго. ХIадисалдаги буго мацIихъан Алжаналде лъугьинарин абун.
Гьел ккола Аллагьасул бищун ццим бахъарал гIадамал. Къуръаналда гьезда пасикъзабиян цIарги лъун буго. Хабал гIазабалъул лъабил бутIа мацI гьабиялдалъун букIуниланги абун буго. МацIихъанасул мурад букIуна жиндаса мацI гьабулев чи рихинги жинде мацI гьабулев чиясе живго лъикI вихьизе бокьиги. Жинде мацI гьабурав чи мацIихъанасда разилъизеги, гьесда тIад рекъезеги кинго бегьуларо.
Щайин абуни, тIоцебе дуе зарал гьабурав чи мацIихъан ккола, гьес диналъул вацасдаса дуда квешаб жо бицун букIинчIебани, мун ракI парахатго вукIинаан. Дуде мацI гьабулев чияс дуда нахъасанги мацI гьабула. Гьереси бицинги, гъибат гьабиги, рекIкI гьабиги, хиянат гьабиги, хIалхъублъиги, хIасадги, гIадамазда гьоркьоб тушманлъи ккезе бокьиги - гьел чорокол хасиятал чорхолъ ругев чияс гурого мацIихъанлъи гьабуларо.
МацI гьабун вачIарав чиясда аскIоб анлъго жо гьабизе ккола. ТIоцебесеб, гьесда божизе бегьуларо, кIиабилеб - мацI гьабугеян абизе ккола, лъабабилеб - Аллагьасе гIоло гьесда ццим бахъине ккола, ункъабилеб - дурго вацасдехун дулъ квешаб хивал бижизе бегьуларо, щуабилеб - мацIихъанасдаги божун, мун дурго вацасул гьес бицараб гIайиб цIехезе лъугьине бегьуларо, анлъабилеб - мацIихъанас дуе гьабураб мацI цогидазеги бицун, мунго мацIихъанлъун лъугьине бегьуларо.
Бугьтан лъей ккола гьечIеб жо чиясде гIунтIизаби. Судалда, доба-гьаниб дагIбадиялде ккарал бакIазда гьересияб нугIлъи гьаби - гьебги бугьтан ккола. Гъибаталъул бугебги, гьелдаса цIикIкIунги мунагь букIуна бугьтан лъолев чиясе. ХIадисалда буго: «Бусурбанчи суризавизелъун гьесда тIасан гьечIеб цо рагIи тIибитIизабуни, Аллагьас тIаде босулеб буго гьев жужахIалъул цIадав виинавизе (вухIизе, рахъу лъугьинабизе) ва гьев гьеб хIалалда гIазабалъулъ вукIине вуго халатаб заманалда», - ян. (ТIабарани)
Цоги хIадисалда буго: «Муъминчиясулъ гьечIеб жо абураб чи Аллагьас «радгъатул хабал» абураб жоялъулъ чIезавизе вуго жужахIалда», - ян. (ХIаким, Абудавуд, ТIабарани)
«Радгъатул хабал» абула жужахIалъул агьлуялъул чурхдуздаса чвахулебщинаб чороклъиялда.
