Дин ккола насихIат
НасихIат босизе лъани, гIемерал пайдаби щола. ГIалимзабаз нилъее гIемераб хазинаги нахъе тана. ХIадисалда буго: «ГIалимзаби руго аварагзабазул ирсилал», - абун. Аварагзабаз жидедаса хадуб гIелму гурони щибго жо течIо, гьединго гIалимзабазги течIо гIелму гурони, хIатта гIумру кьуна хIакъикъат нилъеда бичIчIизабизелъун.
Гьединаздасан ккола Лукъманул ХIакимил цо-цо насихIаталги.
- Я, дир вас! Дуца Аллагьасукьа ﷻ хIинкъаразул гурони квенги кванаге ва гIакълуги дандбай хIакъикъиял гIалимзабазулгун.
- Мун вукIа лъикIал чагIазе лагълъун, амма вукIунге квешазе гьудуллъун.
- Я, дир вас, хIусудчиясул лъабго гIаламат буго. АскIов гьечIеб мехалъ гьудуласде гъибат гьабулеб, вихьараб мехалъ хIелхIедулев, дуде балагь щвараб мехалъ вохулеб.
- Мун чияде хIажалъулареб хIалалъ вукIа, божаравлъун вукIина.
- Дуца дурго кIалдиса къватIибе бачIунеб калам ккун чIезабе, мун вуцIцIун чIанагIан мунагьаздаса цIунун хутIила, дуца гьабизе кколеб калам буго дуе жиндаса ахираталъе пайда бугеб.
- Дуца Аллагьасе ﷻ тIагIат-гIибадат гьаби дурго даран-базарлъун гьабе, матахI-къайиго гьечIого дуе хайир щвела.
- Дуца азарго гьудул ккве, азаргоги дагьав вуго. Дуца цониги чи тушманлъун гьавуге, тушман цохIоги гIемерав вуго.
- Дуца хIикматалда тIадчIей гьабе, мун гьелдалъун хиралъила. Дуца гьеб кIодо гьабе, мунги гьелдалъун кIодолъила, хIикматалъул тIабигIатазул бищун тIадегIанаб жо ТIадегIанав Аллагьасул ﷻ дин ккола.
- Дуца тавбу гьаби нахъбахъуге, хвел ракIалдаго гьечIого бачIунин.
- Жинца гIадамалги живгоги ращад гьарурав ритIухъав чиясул хиралъи ТIадегIанав Аллагьас ﷻ цIикIкIинабула.
- Бокьараб яги рихараб цо жо дандчIвараб мехалъ, дуца цIуни гьабе гьелдалъун, дур рекIелъе ккеялдаса гьеб дуе лъугьараб гуреб, цоги жо дуе маслихIатаб букIинаанилан.
- Дун чанги пашманлъана цо жо абиялдаса, амма киданиги пашманлъичIо кIалъачIого чIеялдаса.
- Налъукье ккеялдаса цIуне, гьеб буго къад инжитлъи ва къаси ургъел.
- Гьардеялдалъун дуца дурго нич инабуге, дуца даруги гьабуге дурго цциналъе къватIив чIвазавиялдалъун. Дуда дурго къадру лъай, дуе гьелдалъун магIишаталъе кумек букIина.
- Воре, мун цIунун чIа гIалимзабигун дагIбадиялдаса. ХIикмат зодаса бацIцIадго рещтIуна ва гьеб лъаларо жидеца гьел жидеего бокьарал жалазде сверизарулел гIадамазда.
- ГIиси-бикъинал жалин дуца умурал кIвар гьабичIого тоге, гьел метералде чIахIияллъун лъугьунин.
- Я, дир вас, кида дандчIвалебали лъалареб жо буго хвел, мун гьелде хIадурго вукIа, гьеб тохлъукьего бачIинчIого букIине.
- Мун лъикI гIенекке дудаса цIикIкIарас абулеб жоялъухъ.
- Дурго гьудулзаби лъелго унел рихьани, мунги а лъелго гьезда цадахъ, гьел хIалтIулел ругони, гьелгун хIалтIе.
