Аварагасул ﷺ малъа-хъваял
ТIадегIанав Аллагьас муъминчи дунялалдаса цIунула, рехъада гурхIулев вехьас жиндирго рехъен гьеб гьалаг гьабулел мучIдуздаса цIунулеб гIадин.
Бусурманчияс квербакъеян абе зулму гьабулесеги мазлумасеги:
Зулмучи ватани, гьев зулмуялдаса нахъчIвайилан абе, гьеб гьесие квербакъи ккола; мазлум ватани, гьесиеги кумек гьабеян абе зулмуялъукьа ворчIизе. (Муслим)
Щив чи вугониги цо бакIалда тIадчилъун тун, ва Аллагьасе бокьун гьесие лъикIлъи гьабизе, Аллагьас гьесие лъикIав вазир кьола, гьесда кIочани, ракIалде щвезабулев, гьесда жиндаго лъани, кумек гьабулев. (Насаи)
Абугьурайратица абуна, дица гьикъанин Аварагасда , гIадамазул бищун лъикIал кинал кколелилан. Гьес абунин: «БетIергьанасукьа цIикIкIун хIинкъулел, гIагарлъи хурхинабизе цIакъал, лъикIалдалъун амру гьабулел, квешалдалъун нагью гьабулел», - илан. (Байгьакъи)
Мазлумасда цадахъ гьесие щвезе кколеб боцIи тIалаб гьабизе кумекалъе арав чиясул Аллагьас Къиямасеб къоялъ сиратIалъул кьода тIаса цогидазул хъущтIулеб мехалъ, хIатIал хъущтIизе толаро. Аллагь гурхIулев вуго ва кинабниги ишалъулъ гурхIел букIинеги бокьула Гьесие. (Бухари, Муслим)
ТIадегIанав Аллагьасе вокьула Жиндаса хIинкъарав, мунагьаздаса вацIцIадав, бугелда гIей гьабулев, разияв, вахчарав лагъ, ай машгьурлъи бокьуларев. (Муслим)
Нужер цоясул ццим бахъараб мехалда, гьес «АгIузу биллагьи мина щайтIани рражим» абе, гьесул ццим гIодобе буссина. (Бухари, Муслим)
Нужеца гIадамазда гьоркьоб маслихIат гьабе, ТIадегIанав Аллагьас ахираталда Жиндирго лагъзадерида гьоркьоб маслихIат гьабула. Щив чи вугониги 17, 19, 21-абилел къояз хIижамат гьабун (би биччан), гьеб гьесие киналниги унтабаздаса дарулъун букIуна. (Абудавуд) Чияс чIаго ва сахлъиялда вугеб мехалъ цо динар садакъаде кьей гьесие лъикIаб буго холеб мехалъ нусго кьеялдаса. (Абудавуд, ибну ХIиббан)
