Росасул магIишат
Росасул магIишат
Росасда тIадаб буго чIужуялъе напакъа кьезе, жидеца гIумру гьабун бугеб бакIалъул гьоркьохъеб гIадаталда рекъараб, чIужу жийго бечедай ятаниги.
ГIаишатидасан бицун буго: «Цо нухалъ Абу Суфянил чIужу Гьинд ячIана Аварагасухъе ﷺ ва абуна: «Я Аллагьасул Расул ﷺ, Абу Суфян цIакъ къарумав чи вуго. Гьес я дун, я лъимал кколеб хIалалъ напакъа кьун хьихьулел гьечIо. Дица балъго хIажатаб къадар гьесул гIарцуда тIаса босани, гьеб мунагьлъун букIинищ?» Аварагас ﷺ жаваб кьуна: «Дуца босизе бегьула гьесул малалдаса дуего ва лъималазе хIажатаб къадар. Амма гьелъие шартI буго исрапалдаса рикIкIалъи», - ян (Бухари).
Гьаб хIадисалъ баянаб бичIчIи кьолеб буго, росас хъизаналъе ва лъималазе хIажатаб ретIел, квен босизе напакъа кьола батичIони яги рукъалъухъ кколеб мухь кьолеб гьечIони, чIужуялъ бегьула гьеб хIакъ гьесул малалдаса балъго тIубазе. ХутIарал харжал гьариял гьесул малалдаса, росасул изнуялдалъун гурони гьаризе бегьуларо, хIатта садакъацин.
Амма гьеб балъго босиялъул къагIида хIалтIизабилалде, чIужуялъе рекъараб буго росгун кIалъан, хIажатаб мал жинцаго кьезе гьев гьесизавизе. Хъизамалда гьоркьор ккарал ричIчIунгутIаби берцинго, дандбан тIуразаризе рекъараб буго. Амма балъгояб къагIидаялъ босизе ккани, цIодорлъи гьабила, гьеб исрапалде бусинчIого букIиналъе ва хъизамалъул гIуцIи биххиялъе сабаблъун ккунгутIиялъе.
