Цо-цо суалазе мухIканлъаби
«Аллагь нужер чурхдузде балагьуларо, ракIазде балагьула»
Цо-цо масъалаби рукIуна гIадамазда ричIчIуларел. Гьелъин гьединаз жидерго пикруялда хIукму къотIунги батулеб.
Цо-цояз абула тIарикъат босарал гIадамазги мунагьал гьарулин ва гьеб мехалъ гьелъул пайда щибилан?
Кинавниги чи сахлъулев гьечIин, цо-цоял холел ругинги абун, больницаби къалеб гIадат гьечIо. Гьединго тIарикъаталде лъугьаравщинав чиги мунагьаздаса цIунуларо. Мунагь лъугьунгутIиги аварагзабазда хасаб жо буго. Муридзабазул мунагьал ккеялдалъун тIарикъат хIажатаб жо гуреблъиги чIезабуларо. ТIарикъаталъул пайда щвечIого хутIуларо, гьелда ракIги чIун устарасухъе арав чиясе. ТIарикъаталъ гIемерал гIадамал чIахIиял мунагьаздаса цIунула, киналго чIахIиял мунагьаздаса цIуничIезулги мунагьал дагь гьарула.
Мунагьал дагьлъизаричIел гIадамазулги, гьезул квешлъабазда данде Къиямасеб къоялъ цIадирабазда лъазе Аллагь рехсей, Аварагасде свалат битIи, истигъфар-тавбу гьаби, лъикIал гIадамал рокьи гIадал гIамалазул цонигияб цIадирабазда мунагьаздаса цIикIкIани, гьев чи жужахIалдаса хвасарлъула. Киналго мунагьалгун вачIиналдаса къиямасеб къоялъ мунагьалгун цадахъ лъикIал гIамалалгун вачIин гIемерго лъикIаб буго. ТIарикъаталъул пайда, кин щунги, щвечIого хутIуларо.
Тасаввуфалъул агьлуялъ «Аллагь», «Аллагь» абун зикру бачиналъе далил бугищ?
Гьелъие далил буго Къуръанги хIадисги. Къуръаналда буго кIигониги аят гьелъие хIужалъун чIолеб. Гьезул буго гьадинаб магIна: «Дуца дурго БетIергьанасул цIар рехсе, мун тIубанго Гьесие гIибадат-тIагIат гьабиялдеги вусса», - ян. «Аллагь» Гьесул бищун хасаб цIар ккола, Гьесул 99 цIаралъул магIна жанибе бачараб. Гьединлъидал Аллагь рехсеян Къуръаналъ амру гьабула.
РакIалъ зикру бачиналъе далил бугищ?
Гьелъие цIакъго гIемерал далилал руго. Щайин абуни, хIадисалда буго: «Аллагь нужер чурхдузде балагьуларо, ракIазде балагьула», - ян. РакI лъикIлъани, цогидаб черх лъикIлъулинги хIадис буго. Къуръаналдаги буго: «Мун гъапулал гIадамаздасан вукIунге», - ян абураб магIнаялъул аят. Гьебго аяталъул байбихьиялъул буго гьадинаб магIна: «Дуца дур БетIергьан рехсе дудаго жанив», - абураб.
Зикруялъул рагIул магIна ккола ракIалде щвей абураб. Аллагь ракIалде щвезе бегьиларилан абулев ккола исламалдаса вахъарав чи. Имам Нававияс хъвалеб буго: «Зикру ракIалъги мацIалъги гьабураб бищун хирияб буго, амма цоялда къокълъулев вугони, ракIалъ гьабураб зикру мацIалъ гьабуралдаса хирияб буго», - абун.
Гьелдасанги бихьула ракIалъул зикру, гIицIго бегьи гуребги, мацIалъул зикруялдасацин хирияб букIин.
АрслангIали ГIумаров
