ГIолохъанал херал
Ибну ГIабасидасан бицана хирияв аварагас ﷺ абунин: «Заман рагIалде гIунтIидал раккизе руго гIадамал миккидул мукъуралда релълъун ботIрол расал чIегIераб кьералъ релъунел. Алжаналъул махI гьезда чIвазе гьечIо», - ян. (АхIмад)
ГIалимзабаз баян гьабуна хераз гьеб пиша гьабиялда гъоркь бичIчIулин гьезие гIолохъанго жалго рихьизе бокьи. БатIалъи гьечIо, ботIрол ва магжил расал чIегIералъ релъун рукIа ялъуни пластикияб операция гьабун сипат-сурат хисизаби букIа. Ахираб заманалда бечедал гIадамаз цIакъ гIемер хIалтIизабулеб жо буго пластикияб операция.
ГIолохъанго рихьизе бокьиялъул мурадго гIемерисезул хвалда цере жалго берцин рихьизе бокьи буго. Щибго гIиллаги гьечIого гIицIго берцин рихьиялъе гIоло черхалда хиса-басиял гьаризе шаргIалъ гьукъун буго. Руччабазул кьунсрул ретIиялда тIасан суал шаргIалъ борхулеб мехалъ, пластикияб операциялъул бицинего бицинарин.
ГIолохъаназе кIодолъун ва гьединго херазе гIолохъанго рихьизе бокьи шаргIалъ какун буго. Аллагьас ﷻ кьураб сипаталда разилъунгутIи ккола гьеб. Аллагьасул ﷻ къадаралда разилъунгутIиялдеги рачуна гьелъ. Аллагьас ﷻ цIунаги.
Жабиридасан бицана, Макка бахъараб къоялъ аварагасухъе ﷺ вачун вачIанин Абу КъухIафа. Гьесул ботIрол ва магжил расал хъахIлъун рукIана. Цинги аварагас ﷺ абуна: «Гьеб кьер кин бугониги хисизабе, амма чIегIераб кьералдаса цIуне», - ян. (Муслим)
