Бищунго лъикIаб диета
Бищунго лъикIаб диета
НигIматал гьарзаяб гьаб заманалъул бищунго кIудияб унти буго дагьаб квен кванаялде нилъго ругьун гьаризе бажарунгутIи. Умумузул заманалда гьадинаб къварилъи букIун батиларо, гьелъул гIаксалда, кванил къварилъи букIараблъи хIакъаб буго. Амма ахираб заманалдайин абуни, бищунго кIудияб гIунгутIилъун лъугьун буго кьаралъи. Тохтурзабазги абулеб буго гьеб бугин чорхол цIайи ва беэнлъи цIикIкIиналъул хIасилин абун. Гьединлъидалги батила, цIакъго гIемерлъун руго диетологал. Руго гьезда гьоркьор тохтурлъиялъул гIелму бугелги, руго чанго моцIалъул курсалги лъугIизарун, жалго ругьунлъаралги. Гьединазул малъа-хъваязул хIасилазги гIемер рохизарулел гьечIо.
Гьаб макъалаялъул мурад кколаро киналго диетологал каки ва гьездаса гIадамазул ракI буссинаби. Аслияб мурад буго исламияб диналъ гьелъие кьолеб къимат бихьизаби.
ТIоцебесеб иргаялда, Бичасул Аварагас ﷺ кутакалда какараб жо ккола гIорцIизегIан кванай. Хирияб хIадисалда буго: «Адамил лъимералъ цIезабичIо чехьалдаса квешаб къвачIа, гьесие гIела кванил дагьалго лукъмаби жиндирго мугъ битIун чIезабизе гIолеб. ГьабичIого рес батичIони, чохьол лъабил бутIа квание, цогидаб - лъиналъе ва лъабабилеб бутIа гьаваялъе те», - ян.
Балагье, бусурбаби, гьаб хIадисалда какулеб буго хирияс ﷺ гIорцIизегIан кванай. Инсанасе рекъараб къадарлъун бихьизабулеб буго лъабил бутIа кванил.
РачIаха гьанже балагьилин нилъер бугеб хIалалде. ГIорцIаницин толаро квен, гьелда гIемер бер бахиллъиялъ.
КIиабизе, вакъун гурони кванангутIи. Бичасул Аварагасул ﷺ чехь кIиго къоялъ тIатIала пурчIинадул чедалъ гIорцIичIин хъвалеб буго тIахьазда. Балагье, нилъер кванаялде. ВакъизегIан чIолев чи кив вугев? Квен гьабун бугин абидал, кваназе тIадаб бугеб гIадин ккола нилъеда.
Лъабабизе, хириял хIадисазда нилъее хирияллъун рихьизарун руго лъагIалида, щибаб моцIалъ ва анкьида жаниб кIал кквезе хасал къоял. ЛъагIалида жанир ругел ккола мухIаррамалъул анцIго къо ва хутIараб моцI. Ражаб ва шагIбаналъул моцIаз кIал кквей. ЗулхIижаялъул микьго къо ва ГIарафа къоялъул кIал. Гьаниб рамазан моцI рехсолебго гьечIо.
Гьединго, щибаб моцI босани, тIоцебесеб, бакьулъ ва ахирисеб лъабго къоги. Итни-хамизалъул кIалалги.
Гьел кIалал кквезе нилъер ияхIги иманги гIуни, бащдаб моцI кIал ккун унеб буго. Гьедин ругони черхалда кьаралъи рекIинги, чорхол цIайи цIикIкIинги къанагIатаб жо буго.
Гьалеха, хIурматиял диналъул вацал, исламалъул диета. Гьеб цIунулев чиясе хIажалъи букIинадай цогидал диетабазул? Узухъда, букIинаро. Исламияб дин берцинго тIубазабиялда жаниб буго сахлъиги, диетаги ва яхI лъадариги.
РачIа, бусурбаби, исламалъул ахIкамал щулаго цIунилин ва хIалтIизарилин. Гьеб мехалъ, щаклъи гьечIого, БетIергьанас нилъ цIунула киналниги унтабаздаса ва балагьаздаса.
Аллагьас кумек гьабеги! Амин!
ГIабдуллагь МухIаммадов
