Бекилалде бухьун лъикI бетIер
«Тик-токалде» жаниве щибаб къойил 800 миллион чи ваккулев вуго»
Дунялалда гIумру гьабун вугев щивав чияс, жиндирго тадбир гьабиялда цадахъго, хадусел наслабазда лъикIаб ва талихIаб гIумрудул нухги бихьизабизе ккола. Инсанас живго битIараб нухде тIовитIиялъе хIаракат гьабизе кколебго гIадин, жиндирго наслаби ритIун ккезариялда тIадги хIалтIизе ккола гьев. Гьесул тасамахIлъиялъул хIасилалда гьез мекъаб нух тIаса бищани, гьесиеги букIуна гьез гьарурал мунагьазда бащадаб жаза.
ГIолохъанаб гIел мекъи ккеялда хIинкъи цIикIкIараб заман буго гьаб. Компьютеразулгун телефоназул техника цебетIунагIан гьеб хIинкъиги цIикIкIунеб буго.
Гьаниб бицине бокьун буго лъималаз телефонал хIалтIизариялъул ва гьелъул хIасилалда ккезе рес бугеб заралалъул. Лъимал рохизаризе бокьуларев чи цониги вукIунаро. Амма, гьел рохизариялъул ахIиялда гъоркь, кьурулъа гъоркье гьел ине бугеб ресалъул пикруги гьабулеб гьечIо. КIудикIудиял телефонал кьола лъималазухъе, гьезухъа гьел хIалтIизарун бажарулин, интернеталде лъугьине кIолин абураб чIухIиги рохелги букIуна умумузул гьурмаздаги. Лъималазул гьунараздаса вохуларев чи вукIунаро, гьеб буго БетIергьанас щивав чиясда жаниб лъураб тIабигIат.
Амма цо рахъалдасан балагьунги тIубалел гьечIо. Цояб рахъалда лъикIлъи батани, цогидаб рахъалда анцIго квешлъи батулеб буго. Заманалда кантIичIони, хадуб кватIунги ккола.
Лъимал гуккулеб социалияб гьинлъун лъугьун буго «Тик-ток». Нилъер лъималги гьелда жанир къан руго. Гьелъул аслияб гуккиги буго хIалтIизабизе бигьалъи, жанибе видео яги сурат реххизе цIакъго бигьаял шартIал рукIин. Гьелда жанир рукIуна челленджал абурал видеороликалги, цо кинаб бугониги гьадингояб жо гьунар гьабулеб гIадин бихьизеги гьабун, нужецаги хIалбихьеян рагIа-ракьанде щун, цогидазги гьабизе букIинелъун малъулаго бихьизаби. Нилъер лъималаз гьеб такрар гьабулеб буго, гьединго, видео бахъунги добего битIулеб буго.
Гьел видеороликазда рукIуна толохIочал ясал, батIи-батIиял кьераз расал релъарал, кIилкIал рарал васал. Гьединал жалазухъ гIемер балагьиялъ, гьеб гIадатияб ишиланги ккун, гьелъулъ щибго сурукълъи бихьулареб бакIалде рачунел руго. Гьел роликазда гьоркьоб хIалтIизабула чорокаб калам, гьебги махсара хIисабалда. ГIемер рихьизарула лутIил къавмалъул нухда ругезул роликал.
Куфруялде инсан вачунел, ислам рихиналде цIалел лахIзаталги гIемер рукIуна видеороликазда жаниб. Гьелъул хIасилалда ислам рехун тарал, мажусиязул яги насраниязул дин берцин бихьаралги гIолилал раккулел руго.
РукIуна роликал тверк абурал, ай чорхол лугбал, хасго мугъалда гъоркьияб рахъ сорозабун гьабулел кьурдаби. Гьеб бихьарал лъимал гьелъулги хIалбихьи гьабизе лъугьуна. «Тик-токалде» жаниве щибаб къойил 800 миллион чи ваккулев вуго. Гьедин пасат гьабулеб буго гIолохъанаб гIел.
Гьединлъидал хIурматиял казият цIалулел, бусурбаби, рачIа нилъерго гIун бачIунеб гIел гьеб пасалъиялдаса цIунизе Аллагьасул къуваталдалъун жигар бахъилин.
Цоги, цIакъ бокьилаан гьабго темаялда нужерго пикраби, нужеда бихьа-тараб нижехъе хъвани. Нижецаги казияталда бахъила. Щайгурелъул, нилъер мурад буго Аллагьасул нухги щулаго ккун нилъер наслаби исламалъул нухда куцай. Гьелда жаниб кинавго чияс бутIа лъуни, беццараб букIинаан.
ГIабдуллагь МухIаммадов
