Подписка – 2023 соналъе
Подписка – 2023 соналъе
ХIурматиял бусурбаби. Гьале тIаде щвана бачIунеб соналъе подписка гьабулеб заман. Цо-цоязда ракIалде ккезе бегьула кидаго цIализе кколеб жойищин казият букIунебилан абун. Нилъер чорхол къуват кквезе, сахлъи цIунизе квен къваригIунеб гIадин, рухIияб рахъалъе чара гьечIого гIелмуги хIажалъула. Цо нухалда кванан нилъ тIубаларелго гIадин, цо нухалъ щвараб гIелмуги гIоларо.
Гьеб кидаго цIи ва цIикIкIинабизе рекъараб буго. Бичасул аварагас ﷺ абун буго: «Аллагьасде гIагар гьавулеб гIелму цIикIкIунареб къо диде тIаде бачIани, дие гьеб къоялъ баккараб бакъалда баракат лъечIо», - ян. Гьелъул магIна ккола гIелму цIикIкIинчIеб къоялда баракат лъечIин абураб. Халкъалъулго хирияв МухIаммад ﷺ аварагасцин гьедин тIалаб гьабулеб букIараб гIелму ва даража цIикIкIин нилъеца тохлъи гьабун тезе рекъоларо.
Балагье, бусурбаби, магIишаталда жаниб, нилъерго рукъалъул къайи-матахIалда, ратIлилъ ва цогидалги ишазулъ нилъеца къойидаса-къойиде лъикIалдаса лъикIаб тIалаб гьабула. Амма диналъул ахIкамзулъин абуни, бугезего бугеб дагьа-макъаб жоялда разилъун чIола. Рокъоб къайи хисичIев, мина къачIачIев чиясда гIабдал вугин абизе гIедегIулел нилъ, динияб гIелмуялъул мискинлъиялда тIадги рекъон рукIуна. Гьеб кIиябго дандеккуни, ахIмакълъи гIунтIизабизе нилъ цIикIкIун рекъарал рукIина.
Кутакалда тохго тараб бакI буго нилъер диналъул рахъ. Чанго анцIго соналъ цебе яги жеги гьитIинго лъазабураб жоялдаги къокълъун, парахат чIун рукIуна. Нилъеда лъазе ккеларищ гьабураб гурони гIамал батулареблъи, гьеб гьабизе жигар гьабизе кколеблъи, гьелъие лъай хIажат букIин. Гьеб кинабго буго цоцада хурхараб.
Гьеб киналъего кумек гьабулеб алатлъун ккола «Ас-салам» казият. МоцIида жаниб кIиго нухалда бачIунеб гьелъ нилъер гIелму цIигьабула. Лъалареб лъазабула, кIочараб ракIалде щвезабула, гIемераб жоялде, хасго гIибадаталде кантIизарула.
ЛъагIалие гьелъухъ кьолел гъурщалги гIемерлъун рихьун, гьебги хъвачIого рукIине муъминзабазе рекъараб гьечIо. Гьеб хъварабги гIоларо. Цо-цогIаги цIализеги ккола. Гьедин гурони гьелъул камилаб пайда бахунаро.
Аллагьас нилъее кьун руго гьеб хъвазе ва цIияб казият щвезабизе рокъоре рачIунел гIадамалги. Гьебги кIудияб нигIмат буго. Гьелъие гьабулеб шукруги ккола казият хъвай. РачIа, диналъул вацал, киназго цадахъ лъугьун хъвазин «Ас-салам»!
