Риидалил гIодоркъояз лъимал мажгитазда
Риидалил гIодоркъояз лъимал мажгитазда
ХIурматиял умумул, риидалил заманалда лъимал рукIуна хIалхьиялда, эркенго. ГIемер гьабураб рахIаталъ лъималазда школалде иналде хIарпалцин кIочараб бакIалдецин ккола. Нилъер пагьму бугин чIезабун буго гIалимзабаз кидаго лъадарулеб букIине кколеб жолъун.
ДагьабгIаги цIикIкIун заманалъ гьеб хIалтIизабичIого тани, гьелъул хIалтIи нахълъула. ГIадатияв чиясецин кидаго цо щиб бугониги жо ракIалдасан лъазабулев вукIине лъикIаблъун рикIкIунеб буго. Гьедин гьабичIони пагьму нахълъун, жо кIочоневлъун, бетIер хIалтIизабизе, ай хIисаб-суалгIадаб бакIалда пикру хадуб гъоларого хутIиялде рачунин абула.
Гьаб макъалаялда рехсей гьабизе бокьараб суал буго, школазда цIалулел лъимал риидалил заманалда цониги жоялде руссинаризе лъикIаб букIиналъул хIакъалъулъ. Гьелъие квербакъулеб буго Дагъистаналъул муфтияталъги. Гьезул тадбиралда гъоркь, щибаб мажгиталда цебе бугеб мактабалда гIуцIун руго гIисинал лъимал цIализариялъул курсал. Гьелъие гIаммаб программаги гIуцIун буго. Гьелда рекъон, радал ичIго тIубаралдаса 11 тIубазегIан, малъула гьезда исламалъул аслаби, Куръан цIализе ва цогидабги бусурбанчиясда лъазе кколел ахIкамал.
Гьеб пикру буго гIемерал пайдаял рахъал жинца жанире рачунеблъун. Щалин гьелин абуни, лъимал руссинарулел руго гIадада рукIиналдаса пайдаяб ишалде, гьезул пагьму лъадариялъе кIудияб кумек кколеб буго, исламияб лъай ва гьелдехун бугеб рокьи цIикIкIинабулеб буго, лъимал мажгиталде ругьун гьарулел руго, гьезда бусурбабазул нух ва гIадат бихьула. Гьел гурелги, гIемерал лъикIал рахъал руго риидал лъимал мажгитазде цIализе ритIиялда жаниб.
Балагье, бусурбаби, Аллагьас нилъее кьун руго гIемерал нигIматал. Мажгиталда лъимал цIализарулел рукIинчIелани, кигIан гIемераб къодай бихьилаан нилъеда гьезда дарсал малъулаго. Гьадинаб рахIатаб заман цебе киданиги букIанадай? Гьелдаса пайда боси гурони нилъее цоги ургъел гьабизе жо хутIун гьечIо.
РачIа балагьизин, лъимал мажгитазде ритIичIого тани, щиб ккезе рес бугебали. Радалидаса къалъизегIан кьижун уна гьезул заман. Къадеялдаса хадуб къватIахъ рукIуна. Гьеб заманалда умумулги жидерго хIалтIабазда рукIун, лъимал кир, кин ва сунде руссун ругелали лъаларо. Инсанасе бищунго квешаб жо буго эркенлъи. Хасго лъимер гьединаб заманалда ругьунлъизе рес буго квешабщиналде.
Гьеб киналдасаго цIунараллъун рукIуна лъимал мажгитазде цIализе ритIулел ругони. Гьенире ритIун тунги гIолеб гьечIо. Рокъоб такрар гьабулеб бугищ гьениб кьураб дарсали хъаравуллъи кквезе кIочене бегьуларо. Лъималазулгун хабар бицине, мадрасалда щиб малъарабали бицинабе. Щайгурелъул, гьелдаса бичIчIула лъималазда кигIан кIвар бугел жал гьел дарсал кколелали. Мажгиталда лъикIал къиматал росаралъухъ лъималазе сайгъатал гьариялъги гъира цIикIкIинабула цIалиялде. Амма щибго цIехечIого, рехун тани, лъималазги гьебго бербалагьи гьабула мажгитазда кьолел дарсазде.
ХIасил гьабун абуни, лъимал риидалил заманалда мажгитазде ритIиялда тIадчIей гьабизе ккела, гьезул цIалиялъул цIех-рех гьабун, гьезда нахъаги чIезе рекъараб буго эбел-инсуе. Заман буго бекерун унеб жо. Лъимал нилъ регIизегIан тани, гьел кIудиялги гIун тарбия кьеялдаса рорчIун ккун ратизе рес буго. Гьединлъидал заман нилъехъ букIаго гьелдаса пайда босизе ккела.
Аллагьас ﷻ кумек гьабеги!
