ХасмухIаммад-хIажиясде

Дур сабрудал гIатIилъи,
Дур гIелмудал камиллъи,
ГIакълуялъул берцинлъи,
Бичас дуе кьун бугеб.

Аллагьасукьа гуреб
Сундукьаго хIинкъичIеб,
ХIалихьатал тархъараб
ГIамалалъул хIикмалъи.

Лъимерлъи, гIолохъанлъи
Яги бахIарлъи-херлъи,
Бичасдаса гъапулаб
БукIинчIо дуе заман. 

БетIергьанас кьунщинал,
ЛъикIлъаби-къварилъаби,
Киназего даимаб
Дуца гьабураб шукру. 

Аллагьасул диналъе
Васал къурбан гьавурав,
Гьаб ракьалда мун гIадав
Ватиларо цойги чи. 

Муршидзабазде рокьи
Щибаб логолъ бессарав,
Берцинал тIабигIатал
ТIолго чорхолъ тIокIкIарав.

ТIолго Дагъистаналъе
Кьураб баркаталъул ицц,
ХасмухIаммад-хIажияв -
Бичасул хирав вали.

ЦIуне, Аллагь, дуца ниж

ЦIобалъе гIорхъи гьечIев
ГIаламалъул БетIергьан,
Гьал панаял рагъазул
БухIи лъазе тоге ниж.

Лъимал камун улбузул
Зобалазде бахунеб,
Зигардигун угьдари
РагIизе тоге, Аллагь.

Ракълие къотIи гьабе
Къудраталъул БетIергьан,
БитIараб нух ккун раче
Улкабазул хункарал.

Халкъал пасат гьарулел,
ГIарцуца жал мехтарал,
ГIаламалъул хIатIазукь
Зурулеб хIукму гьабе.

Биччаге гьаб ракьалде,
Гьарула, Дуда, Аллагь,
Дуде ниж гIассилъулеб
ГIассияб рагъул бухIи.

Дуде руссун гурони
Чара гьечIел нижее,
Гьарула, я БетIергьан
РахIмудал цIадал риччай.

ИБРАГЬИМ МУХIАММАДОВ