Пихъ гьечIеб гъотIода тIил речIчIуларо…
Найица гьоцIо тIола, тIулби кир лъунаниги (Инхоса ГIалихIажи)
Инхоса АхIмад-хIажие
Инхоса АхIмад-хIажи,
Дагъистаналъул муфти,
Устарасул къавулъа
КъватIиб бачIараб канлъи.
Караматал тIатарав,
ТIад-Инхоса Устарас,
ТIабигIатги гIамалги
ГIелмуялда куцарав.
ГIабдулхIамид-дадаца
Иман чорхолъе тIурав,
Эбелалъул инсул нух
Босун хьвадизе лъарав.
Инхоса АхIмад-хIажи
«ХIалакъав» вукIун гьечIо.
ХIал гIуна дур, Дагъистан
Данде бачун хьвадизе.
Дунялалда цIар арав
ГIалихIажил ракьцояв,
ГIалам хадуб ахIизе
ХIал кьеги дуй Аллагьас.
Баракатаб росдал вас,
Дагъистаналъул муфти,
Дунял-ахират дуе
Аллагь разияб кьеги!
2010 сон
АхIмад-хIажи устарасде
СагIид-афандиги чIван
Къварид бугеб халкъалъе,
Къудратав БетIергьанас
БитIун бачIараб канлъи.
Каранда ругъналги лъун
Дагъистан угьдулелъул,
Халкъ диналде ахIарав
АхIмад-хIажи-афанди.
РахIму бугев Бичасул
Болжал тIаде щвезегIан,
ТIад къараб божи-амру
Жинца загьир гьабичIев.
ГьитIинаб къоялдаса
Къуръан-хIадис цIаларав,
ЦIар бугел гIалимахъе
ГIелму босзе хьвадарав.
ГIамалгин хасияталъ
Халкъалъул ракIал цIалев,
РекIелъ бугеб гьуинлъи
Гьурмаца къватIиб кьолев.
Гьуинаб гIамалалъул,
Камилаб гIакълуялъул,
ГIодов виччан гурони
Чиясда кIалъаларев.
Заман чороклъунилан
ЧагIмаллъиялде инчIев,
Чилъиги рацIцIалъиги
ЦIунун хьвадизе кIварав.
ЦIар бугев Устарасул, -
ГIабдулхIамид-афандил,
Къавулъ тIегьан бачIараб
ТIарикъаталъул рахас.
Устарасул наслудал
Ирсалъе мустахIикъав,
АхIмад-хIажи, баркатлъун
Ватаги мун халкъалъе.
Къварилъиялда хадуб
ГIатIилъи камулареб,
ГIаламалда гурхIулев
РахIму гьарзаяв, Аллагь.
Гьадинаб нигIматги кьун
Халкъ бохизе гьабурав,
АлхIамдулиллагь, щукру,
Щибаб рецц Аллагь дуе!
2012 сон
Бице, Устарасда, АхIмад-хIажида
Бице, КIудиясда, АхIмад-хIажида,
Дир урхъараб салам, ГIисал рахъалъан.
ГIемер гьев хирияв, гьесул ракьцояв,
Кьолеб адаб бугин, адаб таниги.
Бице, гьесул ракьда ритIухълъиялъул,
Бакъул чIорал гьанже речIчIанин абун.
ТIад вугев Бичасул кумекги бачIун,
Канлъи щолеб бугин рогьалилъ гIадин.
Бице, БетIергьанас гьев сабаблъун ккун,
Ислам-дин тIегьанин Дагъистаналда.
ЦIодораб, хIеренаб гьесул каламалъ,
Киназулго ракIал тIаде цIан анин.
Гьесул муридазул зикру-свалаталъ,
Унтараб Дагъистан сахлъулеб бугин.
Сас гьечIого унеб гама гIадинан,
Унеб бугин цебе диналъул гама.
Бице, рузман къоялъ Дагъистаналда,
Мажгитал цIун ругин гIолохъабазул.
Къудраталъул кумек щвечIебанани,
Гьаб рахIмат нилъее бачIинароан.
Абе, гьес баркатаб нухмалъи гьабун,
Баркат щун Дагъистан тIегьалеб бугин.
ТIолго Россиялда ислам-диналъул,
Гьесул муридзабаз нур балеб бугин.
Абе, реццги гьабун кIалъалев гурин,
КIудияб балъголъи рагьулев гурин.
Дирго ракI чучулев чи гьев вукIиналъ,
Чучулел рукIанин рекIел пикраби.
Абе, КIудиясда тIаса лъугьаян,
ТIолго муридзабалъ жагьилав дида.
Жив хиралъун хъвараб дир назмуялда,
ТIаса лъугьа абе, АхIмад-хIажида.
Бице, дир урхъараб салам нахъеги,
Гьесул ракьцоясул - ГIисал рахъалъан.
ГIибадат гьайбатав, гIамал камилав,
Гьудуллъи хирияв дир Устарасда.
2017 сон
