Хирияй эбелалде

Ворея, гIадамал, гIисинал лъимал,
Эбелалъул адаб тезе гуринха.
Ворея, чIагоял, руччаби, ясал,
Эбелалъул адаб дагьлъизе гурин.

Дунялалъул канлъи нилъее кьурай,
Эбелалъ малъухъе хIалтIизе ккола.
ХIалги рухIги дуе даим гьабурай,
Херлъи тIад щунилан цуге доегIан.

Ворея, гIадамал, диналъул вацал,
Эбел-инсул адаб гIодоб реххуге.
Ворея, гIадамал, гIумру гьабулел,
Эбелалъул адаб гIарцухъ бичуге.

Ворея, гIадамал, цIодорго рукIа,
Херлъарайго эбел учуз йихьуге.
Рахьдал цIураб керен дур кIалдибги чIван
ЧIегIерал сардазда дуе гьимарай.

Гьабунилан квенги кваналареб гьелъ,
Лъимал киндайилан нужер ургъелалъ.
Вореха, чIагоял, чIамучI гьабуге,
Эбелалъул адаб жалгъалго тоге.

Нилъер гIумруялда гIуж лъезе гурин,
Бабал каранда ракI кидаго буго.
Дие эбелалъул хинкI квине щвечIо,
Рохел гьечIел къоял лъаге улбузда.

ШАПИ ХIАСАНГIАЛИЕВ, ХIАБЩИБ РОСУ