Бищун кIудияб нигIмат
ШайтIаналъ свак тун щаклъи бекьулеб, нафсалъ мунагьалде тIамулеб гьаб хIалбихьиязул дунялалда нилъер щивасе къваригIуна рацIцIалъи. ГIурхъи гьечIеб шукру БетIергьанасе ﷻ мунагьал гьаридал тавбу нилъее кьуралъухъ.
«Астагъфируллагь» аби гIицIго рагIабазул дандрай гуреб, муъминчиясул къуватаб ярагъ ккола. Гьезда жаниб буго къуват, Аллагьасул цIобалдалъун, бищунго чIахIиял мунагьалцин тIагIинаризе кIолеб. Аллагьасул Расулас ﷺ мунагь гьечIев вукIаниги, гьоркьоса къотIичIого ТIадегIанав Аллагьасде ﷻ вуссун тIаса лъугьаян дугIаги гьабун, къойил 70 цIикIкIун нухалъ «Астагъфируллагь» абун! Гьоркьоса къотIичIого мунагьал гьарулел нилъеца кинаб хIалалъ тIадчIей гьабизе ккелареб гьел рагIабазда?
ТIадегIанав Аллагьас ﷻ Къуръаналда абун буго (магIна): «Дуца абе, МухIаммад! Я гьал жидеца напсазе зулму гьабурал Аллагьасул ﷻ лагъзал! Нужер хьул къотIуге Аллагьасул ﷻ рахIматалдаса. ХIакълъунго, Аллагьас ﷻ киналго мунагьал чурула тавбу гьабун Аллагьасде ﷻ вуссарав чиясул. Аллагь ﷻ вуго мунагьал чурулев ва Жив муъминзабазда гурхIулев», - ян (сура «Аз-Зумар»).
Халгьабе, ТIадегIанав Аллагьас ﷻ «мунагь гьарурал» абичIо, «напсазе зулму гьабурал» абуна, гьелдалъун Гьесул ﷻ гурхIел-рахIму нилъер кинаб букIаниги мунагьалдаса цIикIкIараб букIин бихьизабун.
ХIакъикъияб тавбуялъул шар-тIаздасан ккола: гьабураб мунагьалда ракI-ракIалъулаб пашманлъи, мунагь гьеб хIалалда тей ва гьелде киданиги тIадруссинчIого рукIине щулияб къасд гьаби.
ЛъикIал гIамалалгун цадахъ гьабураб тавбуялъул, хасго садакъа кьейгун цадахъ, хасаб къуват букIуна. Аварагас ﷺ абуна: «Лъеца цIа свинабулеб гIадин, садакъаялъ мунагьалги свинарула», - ян (Тирмизи). Цогидаб хIадисалда буго: «Тавбуялъ жиндаса цебе гьабурабщинаб бацIцIуна», - ян (АхIмад).
Хириял муъминзаби! Аллагьасул ﷻ рахIматалде бугеб хьул шайтIаналъ бикъизе тоге. РакIалде щвезабе берцинаб хIадисул къудси, гьениб ТIадегIанав Аллагьас ﷻ абулеб буго: «Я, Адамил лъимер, дуца Диде ﷻ ахIулебгIан ва Диде таваккал гьабулебгIан мехалъ, Дуца щиб гьабуниги Дун тIаса лъугьине вуго ва гьелъул ургъелги гьабизе гьечIо», - ян.
ХIисаб гьабеха, Аллагь вохула Жиндирго лагъасул тавбуялдаса, квенгун, лъимгун авлахъалда жиндирго тIагIараб варани батарав сапарчиясдасаги цIикIкIун. Гьеб Халикъасул рохел ккола Гьесул нилъедехун бугеб рокьул бищунго кIудияб далиллъун.
Биччанте «Астагъфируллагь» абураб рагIи нилъее даимаб гьалмагълъун лъугьине: щибаб какда хадуб, кьижилалде, хIалбихьиялъул ва рохалил лахIзаталда.
Аварагас ﷺ абун буго: «Гьоркьоса къотIичIого тавбу гьабулев чи Аллагьас ﷻ щибаб пашманлъиялдаса тархъан гьавула, щибаб захIмалъиялдаса ворчIизе нухги хьул гьечIеб бакIалдаса ризкъиги кьола», - ян (Абу Давуд).
Я Аллагь! ГIемер тавбу гьабулел чагIаздасан гьаре ниж. Дунялалдаги ахираталдаги Дур ﷻ рахIмат щварал, Дур ﷻ ритIухъал лагъзадеридасанги гьаре. Амин.
