ТалихIалде рачунел…
Аллагь ﷻ разилъи ва гьелде рачунел гIамалал гьари буго нилъедаса диналъ тIалаб гьабулеб жо, гьеб букIине ккола чиясул аслияб пишаги гьаб ракьалда. ГIамал гьабиги букIине ккола Аллагь ﷻ тIаде валагьун вугев кинниги ихласалда. Гьедин гьабураб къабул гьабиялде гIагарабги ккола.
Имам Гъазалияс хъвалеб буго кIиго жо бугин чиясулъ кидаго букIунареб, тIоцебесеб – гIолохъанлъи, кIиабилеб - чорхол къуват абун. Жинца пайда кьолебги кIиго пиша буго: тIабигIат берцинлъи ва напсалъул сахаватлъи. Гьединго, кIиго пиша буго жидеца къадру борхизабулеб: жиндирго гIодове виччай, гIадамазул хIажатал тIурай.
КIиго пиша буго балагьал нахъчIвалел: садакъа кьей ва гIагарлъиялъулгун бухьен щулаго кквей.
Цо нухалъ Лукъманул ХIакимил васас цIехон буго щиб пиша бугеб бищун лъикIабин абун. Васасе жаваб гьабун Лукъманица абун буго, дин, боцIи, нич, тIабигIат берцинлъи ва сахаватлъи бугин. Цинги хадубги абун буго, чиясулъ гьал пишаби данделъани, гьев вукIунин вацIцIадавлъун, БетIергьанасдаса ﷻ хIинкъулевлъун, Гьесул ﷻ валилъун, шайтIаналдаса цIунаравлъун абун.
КантIизе рекъарал пишаби
БетIергьанасде, расуласде, диналде ва ватIаналде хиянат гьабуге.
Дуца хъачIлъи бихьизабуге инсуда, эбелалда, вацасдагун яцалда.
Къарумлъи бихьизабуге чIужуялда, лъималазда, гIагарлъиялда ва гьудулзабазда.
СогIлъигун гьумер букIкIин бихьизабуге ятимзабазда, мискинзабазда, пакъирзабазда ва унтарал чагIазда.
Дур ццин бахъунге гIалимзабазда, лъикIаб-квешаб малъулев мугIалимасда, Аллагьасдаса ﷻ хIинкъарал ва ригьалде рахарал чагIазда.
КъотIизе тоге как бай, Къуръан цIали, зикру бачин ва гIагарлъи хурхинаби.
Ккезе биччаге мунагь, гукки, хIасад ва ракIхъублъи.
ТIадчIей гьабе сабруялда, хIелмуялда, гIелмуялда ва сахаватлъиялда.
ЦIуни гьабе шайтIаналдаса, напсалдаса, шагьваталдаса ва квешав гьудуласдаса.
РикIкIалъе гьереси бицунев, викъарулев, хIасад ва мацI гьабулесдаса. Гьалмагълъи гьабе ракIбацIадав, къотIи тIубалев, сахаватав ритIухъав чиясулгун.
ГIемер гьабе садакъа, дугIа, тавбу, салават битIи.
Дагь гьабе кьижи, кванай, калам ва кIвахIаллъизе черх тоге.
Чорхолъе биччаге пашманлъи, гIажизлъи, бахиллъи ва хьул халалъи.
