МугIазие гьабураб насихIат
Аварагас ﷺ Йеменалде ритIана Абу Муса ал-АшгIарий ва МугIаз бину Жабал. Гьезие гьадинал малъа-хъваялги гьаруна:
«Нужеца гьезие бигьалъи гьабе, захIмалъи гьабуге, гьел гIагар гьаре, тIуризаруге, нуж кIиялгоги цоцазде адаб-хъатиралда рукIа ва цоцазда гьоркьоб хилиплъи ккеялдаса цIуне. Нужеца гьезул ракIал роххизаре ва хIеренго, берцинго ахIе Аллагьасе мутIигIлъиялде
Я, МугIаз, духъе рачIина китабалъул агьлу (насраниял). Дуца гьел ахIе шагьадат битIиялде, гьел дуе мутIигIлъани, дуца гьезда бице Аллагьас киназдаго сордо-къоялда жаниб тIад гьабун бугин щуго нухалъ как базе, гьелъиеги гьел мутIигIлъани дуца гьезда бице Аллагьас гьезул боцIиялда закагIат тIад гьабун букIин, гьезул бечедазухъаги босун гьезулго пакъиразе кьезе. Мун цIуне цоясе дуца зулмуги гьабун гьес дуе квешаб дугIа гьабиялдаса, гьесул дугIаялдаги Аллагьасдаги гьоркьоб пардав гьечIо», - абун.
Щай МугIаз гIодарав Аварагас ﷺ Йеменалде нуха регIулелъул?
Авараг ﷺ къватIиве вахъана Маккаялъул рагIалде, гьев нуха регIун, малъа-хъваял гьарулаго. МугIаз рекIун, Авараг ﷺ лъелго вукIана. Гьениб Аварагас ﷺ абуна:
«Я, МугIаз, дида ракIалде ккола гьалдаса хадуб нилъ чIаго дандчIваларин ва мун дир мажгиталдеги хабадеги зияраталъ вачIине ватилин», - абун.
Гьеб мехалда МугIаз гIодана.
ХIакъикъаталда гьедин ккезеги ккана. Аварагас ﷺ дунял тана МугIаз Йеменалда вукIаго.
