Аварагасул ﷺ цо-цо вакъигIатал
Аварагасул ﷺ цо-цо вакъигIатал
РитIучIазул къиса
Бусурбабазул эбел Умму-Саламатидаса бицана: «Цо нухалъ Бичасул Расул авлахъалда вукIаго гьесда рагIана гьаракь: «Я Бичасул Авараг! Я Бичасул Авараг!» - ан ахIулеб. Аллагьасул Расул ﷺ сверухъе валагьана ва щибниги бихьичIо.
Гьев цодагьав довегIан индал, цIидасан рагIана ахIулеб гьаракь. Аллагьасул Расул ﷺ нахъеги сверухъе валагьана ва щибниги бихьичIо. Гьеб гьаракь цIидасанги такрарлъана. Гьеб гьаркьихъе индал Авараг ﷺ тIаде ккана кварица бухьараб ритIучIалде, гьелдаса гIемер рикIкIад гьечIого, ракьалда тIадги вегун, бакъукь кьижун вугоан гIалхул гIарабиявги. Халкъалъул Хириясдехунги ﷺ буссун ритIучIалъ абуна: «Я Аллагьасул Расул, гьав гIарабияс ккуна дун дагьаб цебе. Дир буго кIиго гьитIинаб тIинчI, дуца биччаларищ дун, гьеб кIиябго тIинчIги кваназабун, бачIине?» – ян. Аварагас ﷺ гьикъана: «Унго, бачIинищха мун?» – илан. РитIучIалъ жаваб гьабуна: «Аллагьас дие магъало бакIарулев чиясе гIадинаб гIазаб гьабеги, дун бачIинчIони», – ян. Аллагьасул Расулас ﷺ гьеб бичана ва ритIучI ана. ГIемер мех бачIого тIанчIалги кваназарун гьеб тIадбуссана. Авараг ﷺ лъугьана гьеб букIахъе бухьине ва гьеб мехалъ гIалхул гIарабияв макьидаса ворчIана ва ХIабиб ﷺ вихьидал гьес абуна: «Дир эбел-эмен дуе къурбанлъаги, я Бичасул Авараг! Дихъе гьеб кквезе щвана дагьалъ цебе, дуе хIажат бугищ гьеб?» – илан. Аварагас ﷺ бугилан абуна. ГIарабияс абуна гьанже гьеб дур бугилан. Халкъалъул Хирияс ﷺ ритIучI цIидасан бичана ва биччан тана. РитIучI бохун кIанцIана ва абуна: «Дица нугIлъи гьабула жиндие лагълъи гьабизе кколеб щибниги гьечIин, цохIо Аллагь гурони ва гьединго нугIлъи гьабула мунги Гьесул чапар вугилан», - абун. (Абу НугIайм, ТIабарани Байгьакъи).
