Дунял ва ахират
Дунял ва ахират
Жинда Аллагь ﷻ разилъаяв ГIабдуллагьил вас Жабирица бицана: «Ниж свалат-салам лъеяв аварагасул мажлисалда гIахьаллъун рукIаго, хирияв аварагасде аскIовеги вачIун, хъахIаб гьумералъул, берцинаб кьералъул, хъахIаб партал ретIарав пуланав чияс салам кьун хадуб аварагасда гьикъана: «Я Аллагьасул расул! Щибжо кколеб дунял?» - ан.
Хирияв аварагас ﷺ абуна: «Гьеб буго берцинаб макьу, гьениб гьабураб лъикIаб гIамалалъухъ кириги, квешаб гIамалалъухъ гIакъубаги букIунеб», - ан. Нахъеги гьес гьикъана: «Я Аллагьасул расул! Щибжо кколеб ахират?» - ан. Аварагас ﷺ абуна: «Гьеб буго даимаб рукъ, цо къокъа алжаналда, цогидаб къокъа жужахIалда букIунеб», - ан. Хадубги гьес гьикъана: «Я Бичасул авараг, щибжо кколеб алжан?» - ан. Аварагас абуна: «Гьеб буго БетIергьанас, дунял рехун тарав чиясе, хисун кьолеб нигIмат», - ан. Гьес нахъеги гьикъана: «Щибжо кколеб жужахI?» - ан. Хирияс ﷺ жаваб гьабуна: «Гьеб буго дунялалда хадур лъугьун, ахират рехун тарав чиясе бугеб жазаъ», - ан. Гьес щуабизеги гьикъана: «Я Аллагьасул расул! Дунялалдаги ахираталдаги гьоркьоб кигIан заман бугеб?» - ан. Аварагас абуна: «Бер къан рагьизегIан заман гурони гьечIо», - ян. Цинги гьев чи нахъе индал свалат-салам лъеяв аварагас абуна: «Гьав вуго ЖабрагIил малаик, нужер дунялалдаса хьул буссинабизе ва ахираталде хьул лъезабизе вачIарав», - ан.
Жинда Аллагь ﷻ разилъаяв ХIасанул Басрияс бицана: «Дица тIалаб гьабуна ункъо соналъ аварагас щибаб рузман къоялъ гIадамазе гьабулеб букIараб хутIба. ГIемер тIалаб гьабун хадуб дида гьеб батана Жабир бин ГIабдуллагь абурав ансариязул цоясухъ. Цинги дица гьесда гьикъана: «Дуда рагIанищ аварагас щибаб рузман къоялъ гьабулеб букIараб хутIба?» - ян. Жабирица жаваб гьабуна: «РагIана, гьес щибаб рузман къоялъ абулаан: «Ле, иман лъурал гIадамал! ХIакълъунго, инсан кIиго заманалда гьоркьов вуго. Цо араб заман, Аллагьасда цебе гIамал къабуллъараб яги нахъчIвараб, лъалареб. КIиабилеб, бачIунеб заман, БетIергьанас щиб хъван бугебали лъалареб. Гьединлъидал нужеца ахираталъе пайдаяб бакIаре щибаб цIалеб хIухьелалда гьоркьобги, гIолохъанлъиялдаса херлъизегIанги, чIаго ругелгIан мехалдаса хвезегIанги. Аллагьас дунял нужее бижун буго, амма нуж ахираталъе рижун руго, дун Аллагьасул цIаралдалъун гьедула, гьаб дунял тун хадуб инсанасе рукъ гьечIо, алжан яги жужахI тун батIияб», - ан.
Аварагас ﷺ абуна: «Щив чи вугониги дунялалъул ургъалида радал тIаде вахъун, Аллагьас гьесде тIаде лъабго пиша тIамула: киданиги тIаса унареб ургъел, кидаго лъугIулареб хIалтIи, жиндир ахир гьечIеб мискинлъи», - ян. Фузайл ибну ГIиязица хъвалеб буго: «Кинабниги квешлъи цо рокъобе жанибе бакIарун буго, гьелъул кIулалги дунял бокьи буго. Кинабниги лъикIлъи цо рокъобе бакIарун буго, гьелъул кIулалги дунял рехун тей буго», - ян.
Цо нухалъ ЖабрагIил малаикас жинда свалат-салам лъеяв НухI аварагасда гьикъана: «Я БетIергьанас бищун халатаб гIумру кьурав авараг, дуда гьаб дунял кинаб жо батараб?» - ан. НухI аварагас жаваб гьабуна: «Дида гьеб батана кIиго нуцIа бугеб рукъалда релълъараб жо, цоялдаса жанире рачIунеб, цогидалдаса къватIире лъугьунеб», - ан.
Аллагь ﷻ разилъаяв ГIали-асхIабас абуна: «Щив чи вугониги анлъго пиша данде гьабун, гьев вуго жиндие алжанги щварав, жужахIалдасаги рикIкIалъарав: жинда Аллагьги лъарав гьесиеги мутIигIлъарав, жинда щайтIаналъул макруги лъарав ва гьелдаса рикIкIалъарав, хIакъаб жо тIалаб гьабурав, гьелда нахъги вилъарав, батIулаб жоги бичIчIарав, Аллагьасукьа хIинкъун гьебги тарав, дунялги, гьелъул гIодобегIанлъиги лъарав ва Аллагьасе гIоло гьеб рехун тарав, ахираталъул тIадегIанлъи лъарав, гьеб тIалабги гьабурав чи», - ян.
АхIмад МухIумаев
