ТIаса ине гурин
НигIматалде гIадамал хехго ругьунлъула. Дагьалъ цере хIажалъиялда рукIун, Аллагьасдаса кумек гьарун, захIмалъаби рихьун, жидерго ахIвал-хIал хисиялъул анищазда хьулалда рукIана. Амма гьоркьоб заман уна, ТIадегIанав Аллагьас гьезие талихIги, сахлъиги, гIелмуги, адаб-хIурматги кьола, цинги дагь-дагьккун гьезда цебе жидерго букIараб хIал кIочон тола.
Гьединаб кIочон теялъухъ бугеб хIинкъиялъул бицана бану исраилаздасан лъабго чиясул хIакъалъулъ бачIараб машгьураб хIадисалда. Гьезул цоясул тIомол захIматаб унти букIун буго, кIиабилесул - ботIрода рас бижулароан, лъабабилев - беццав вукIун вуго. Гьев лъабасулго букIун буго мискинабго гIумруги.
ТIадегIанав Аллагьасе бокьана гьезул хIалбихьизе ва гьезухъе малаик витIана. ТIоцебе малаик вачIана тIомол унти бугев чиясухъе ва гьесда гьикъана щиб дуе бищунго бокьун бугебилан. Гьесие бокьун букIана унтудаса эркенлъизе, сахлъи бугеб тIом букIине. Малаикас гьесул черхалда тIад квер бахъана, Аллагьасул амруялдалъун унти тIагIана. Цинги гьев чияс варанаби гьарана, Аллагьас гьел гьесие кьуна.
Гьелдаса хадуб малаик вачIана кIиабилев чиясухъе. Гьесие бокьун букIана берцинаб рас, Аллагьасул амруялдалъун, гьесие гьеб щвана. БоцIи-малалдаса гьес гIачи тIаса рищана, Аллагьас гьесие гьел кьуна.
Цинги малаик вачIана беццасухъе. Гьесие бокьун букIана Аллагьас канлъи бачIинабизе. Малаикас гьесул беразда тIад квер лъуна ва гьесда канлъи бихьана. Цинги гьес чахъаби гьарана, Аллагьас гьесие чахъаби кьуна.
Заман ана. Лъабалго бечелъана. Цоясул рукIана гIемерал варанаби, цогидасул - гIачи, лъабабилесул - чахъаби. Амма гьеле гьеб мехалда байбихьана унго-унгояб хIалбихьи.
Малаик нахъеги вачIана тIоцевесесухъе, гьаб нухалда мискинасул сипаталда. Жив нухлулав вугин, цо варани кьеян гьарана. Гьес инкар гьабуна. Малаикас гьесда ракIалде щвезабуна цебе гьесул букIараб мискинаб гIумру ва амма гьев чияс кинабго жоялдаса инкар гьабун, жиндир мал-мулк умумуздасан щвараб бугин абун бицана.
КIиабилесеги гьебго жо гьабуна. Гьесги инкар гьабуна мискинчиясе цо гIака кьезе ва гьединго инкар гьабуна жиндирго цебесеб гIумруялдаса.
Цинги малаик вачIана цеве беццавлъун вукIарасухъе ва цо чахъу гьарана. Гьес тIубанго батIияб жаваб кьуна: «Дун хIакъикъаталдаги беццав вукIана. Дун мискингоги вукIана, Аллагьас дие бечелъи кьуна. Гьединлъидал дуе бокьараб къадар чахъабазул баче», - ян. Гьесда кIочон течIо жиндирго мискинлъи, унти, бищун аслияб жо, гьесда кIочон течIо жиндир ахIвал-хIал хисарав Аллагь.
Цинги малаикас гьесда лъазабуна гьеб хIалбихьи букIиналъул ва Аллагь дудаса рази вукIиналъул.
Гьеб хабаралъ нилъеда малъулеб буго цо кIвар бугеб жо: инсанасе пайда буго зама-заманалдасан жив цеве кин вукIаравали ракIалде щвезабиялъул. Араб заманалда гIумру гьабизе гуреб, Аллагьасул рахIматазде шукру гьабизе.
Щиб лъалеб, цо заманалда инсанасул анищ букIун батила гьанже жинда гIадатияблъун бихьулеб хIалтIи. Гьес Аллагьасда гьарулаан хъизан, лъимал, рукъ, сахлъи, талихI. Цебе гьев гIибадаталдаса рикIкIад вукIана, гьанже жив пашманлъулев ишал гьарун рукIана. Цинги Аллагьас гьесул ахIвал-хIал хисана.
Цебе букIарабги жакъасебги дандеккун инсанасда лъикI бихьула ТIадегIанасул гурхIел-рахIму, Гьесие цIикIкIун шукру гьабулевлъун лъугьуна.
ГIелму щведал - гIемераб жо лъалареб заман ракIалде щвезабе. Бечелъани, дурго хIажалъи букIараб заман ракIалда щвезабе. Аллагьас дуе сахлъи кьуни, дурго унти ракIалде щвезабе. Гьес мунагь рехун тезе кумек гьабидалги ракIалде щвезабе, кигIан захIмат букIарабали гьелдаса вахъун ккезе.
Гьединал ракIалдещвеяз цIунула чIухIиялдаса ва «кинабго дицаго тIалаб гьабуна» абураб пикруялдаса.
Баркала кьей кколаро гIицIго «АлхIамдулиллагь» аби. Гьеб загьирлъула ишаздалъун. Аллагьас дуе бечелъи кьун батани, дуца кумек гьабе къварилъиялда ругезе. Гьес дуе гIелму кьун батани, дуца гьелдаса пайда босе цогидазде гьеб малъун. Гьес дуе хъулухъ кьун батани, дуда гъоркь ругел инжит гьаруге.
Жидерго цебесеб гIумру ракIалда бугев чиясда цогидалги бигьаго ричIчIула. Жиндирго букIараб хIажалъи ракIалде щун мискинасухъ чIухIиялдалъун гьев валагьуларо. Жиндирго букIараб жагьиллъи ракIалда бугев гIелмуялдаса чIухIуларо. Ва гьез икъбал цохIо жидедаго хурхинабуларо, щайгурелъул гьезда бичIчIула гьеб кинабго Аллагьасул рахIмат букIин.
Гьединлъидал нилъер щивасе лъикIаб буго цо-цо мехалъ лъалхъун ракIалде щвезабизе: цеве дун кин вукIаравали, Аллагьасда щиб гьарарабали, кинал захIмалъаби рихьаралали, цо заманалда анищлъун кколеб букIараб жо ТIадегIанас жакъа гIумруялъул бутIалъун лъугьинабураблъи. Цинги кинабго ракIалдеги щун, ракI-ракIалъ абе: «АлхIамдулиллагь, кинабго рецц ТIадегIанав Аллагьасе буго», - ян.
