Дару гьечIеб унти бижичIо
Щивав муъминчиясда тIадаб жо буго даим квешлъи малъулеб букIунеб жиндирго нафсалде данде къеркьезе, хасго Аллагьасул ﷻ амру тIубазе инкар гьелъ гьабураб мехалъ. Гьеб къеркьей цебесеб буго, хIатта загьирав тушманасде данде вагъиялдасаги.
Цин цо мунагь гьабизабун, цинги цогидаб мунагьалде ахIун, дагь-дагьккун инсан гьалаглъизави мурад букIуна нафсалъул. ЦохIо мунагьги кIудияб жо буго. Мунагьал гIемерлъи, гьезда даимлъи цIакъго хIинкъи бугеб жо буго. ХIадисалда абун буго: «Мунагьал капурлъиялъул чапарзаби ругилан», ай капурлъиялъул церехъаби. Нафсалдаса къун мунагь гьабун ккараб мехалъ чияс щибха гьабилеб? Мунагь гьабиялдалъун кколел квешал хIасилаздаса цIунун хутIизе тавбу гьабила.
Мунагьаб жо тезе кIоларого вугони, кIвахIалъ нахъчIван, яги гьелдаса щола бугеб лазаталъ кверде восун, яги цоги кинаб бугониги гIилла сабаблъун ракIалде щвезабизе ккола кинабго гьоркьоб къотIизабулеб, лазат-кеп биххизабулеб, чара гьечIого тIаде бачIине бугеб хвел. Хвалица чIаголъи чIунтизабула. Хвезе гьечIев чиги гьечIо. Тавбуги гьабичIого вукIаго хвел тIаде бачIани щибилеб. Чара бухIулаха гьеб мехалъ. ГIемерисел гIадамал холла мунагьал гьариялда гIумру тIамулаго, тавбу гьабизе лъачIого, ургъичIого, регIичIого, хадуб гьабилин тун, жеги заман бугилан чIун. Заманин абуни, бихьулищха букIунеб гьечIеб.
Гьаб хIалалда хварав захIматаб бакIалде иш ккарав чи вукIуна. Кодоблъиго гьечIого чIового хутIарав чи – гьеле гьев. Гьединавлъун ккезе, кантIизе мисалалги цере рукIаго, чIагояв чи чIезе бегьиларо.
Тавбу гьабунгутIиялъе гIилла, мунагь кIудияб букIун, Аллагьас ﷻ гьеб къабул гьабиялдаса хьул къотIи батани гьеб къосараб пикру буго. Аллагьасул ﷻ рахIматалдаса хьул лъилго къотIизе бегьуларо. Гьеб жибго буго кIудияб мунагь. Гьелдасаги доб мунагьалдасаги кIиялдасаго тавбу гьабизе ккола. Аллагьасул ﷻ рахIмат киназего гIаммаб, гIатIидаб букIинги лъазе ккола. ГIасилъарал чагIаздехун Аллагьасул ﷻ гурхIел, гIакъубаялдаса цебе ккараблъун буго. Аллагьасе ﷻ рецц.
