ЛъикIаб хIалтIудалъун борхула чиясул къимат
Буйнакск районалъул ЧIикIаб росдал мадрасалъул тарбиялда гъоркь, Хьаргаби росулъги цIалун, исламияб гIелмуялъул тIадегIанаб лъайги босун, хIалтIизе вачIана ЦIияб ЧIикIаса ГIисахIажил Шамил. Гьесул бажариги бихьун, Шамил тIамуна росдал мажгиталъул имамлъун.
ГIолел-гIоларел рахъазул хIисабги гьабун, жамагIаталда дандги бан, Шамилица байбихьана хIалтIи гьабизе. Масала, мажгиталъул тIох хисун лъугIизабуна къокъаб заманалда жаниб. Гьев имамлъун хIалтIизе лъугьаралдаса жамагIаткакде рачIунезул къадарги гIемерго цIикIкIана.
ХIукму гьабуна мажгит гIатIид гьабизе ва гьебги гьабуна хехаб заманалда жаниб. Гьелдаги гIей гьабичIого, жеги тIадеги балебги буго. Гьеб базе росдал гIадамаз кумекги гьабула. Цо муъминчияс кьучI лъезе миллион гъурущцин кьуна.
Гьелдаго цадахъ авал-мажгиталги ралел руго. Имамас тIадчIей гьабула гIадамаз исламалъул щуябго рукну гъалатI гьечIого тIубазабиялде, халкъалда гьоркьоб «Ассалам» газеталъул къадар цIикIкIинабиялде.
Гьединго пайда кьолеллъун лъугьана мажгиталда гьарулел данделъабиги. Берзукьа бахъун гьечIо мискинал, язихъал хъизаназул, ятимазул, чIахIиял чагIазул тIалаб-агьаз гьаби. Гьезул сияхIги гьабун, щивасе щвезабула кванил нигIматал, ретIел-хьит.
ГIемераб заман букIана как ахIизе будун щоларого. Имамас вачун вачIана жиндаго цадахъ цIалулев вукIарав гIолохъанав гIалим будунлъи гьабизеги. ГIолохъабазул жигараб гIахьаллъигун тIоритIула батIи-батIиял хIаял ва турнирал.
Шамилица данде гьаруна гIолилал ва гьел ахIула вацлъи цIунизе ккеялде. Гьанже гьесда тIадкъан буго мадрасалъе бетIерлъи гьабизеги, гьенибги имамас цIакъ кIвар кьун гьабулеб буго хIалтIи.
НАСРУЛА АБАКАРОВ, ЦIИЯБ ЧIИКIАБ РОСУ.
