Къурбаналъул гIид
Хириял диналъул вацал ва яцал, Россиялъул бусурбаби! РакI-ракIалъ баркула нужеда кIудияб Къурбаналъул байрам!
Гьеб кIвар цIикIкIараб къоялъ нилъеца ракIалде щвезарула Къурбан хъвеялдалъун ТIадегIанав Аллагьас нилъее кьолел бищунго пайдаял дарсал. Гьеб буго нилъер щивасе ТIадегIанав Аллагьасдехун бугеб рокьи ва мутIигIлъи бихьизабизе рес щолеб къо, гьединго, гIага-божараздехун гьабулеб бербалагьиги.
Къурбаналъул гIидалъул байрамалъ ракIалде щвезабула ТIадегIанав Халикъ рази гьавиялъе гIоло къурбан хъвеялъул ва жиндирго мал-мулк хвезабиялъулъ бугеб кIодолъи. Гьеб къоялъ нилъеца рохел гIахьал гьабула нилъер кумек жидее къваригIаразулгун, тIаде-гъоркье щола гIагарлъиялъухъе, гьудулзабазухъе, ТIадегIанав Аллагьасда гьарула нилъерго къурбанги киналго лъикIал гIамалалги къабул гьареян абун.
ТIадегIанав Аллагьас Хирияб Къуръаналда рехсон, нилъеда ракIалде щвезабулеб буго (магIна): «Нуж киданиги такъваялде (ва Халикъасул разилъиялде) щвеларо нужее бокьулеб жоялдаса (бечелъиялдаса) Гьесул нухда харж гьабизегIан. КигIан (цIикIкIун) нужеца харж гьабуниги, Аллагьасда гьеб лъала (Гьес нужее гьелъухъ тIубараб кири кьезеги буго)», - ян (сура «Алу ГIимран» аят 92).
Биччанте гьал рагIабаз нилъер ракIал гьесизаризе, хасго байрамалъул къоялъ, лъикIал гIамалал гьаризе ва сверухъ ругезде, гIумруялъулъ захIмалъаби дандчIваразде, хIажалъи ккарал чагIазде кIвар кьезе.
Нилъер гIатIидаб ВатIаналъул тIолабго рахъалдасан аза-азар вацал-яцаз сапар бухьана Макка-Мадинаялъул хирияб ракьалде исламалъул кIвар бугел рукнабазул цояб – хIеж тIубазе. Гьарула ТIадегIанав Аллагьасда гьезул хIеж къабул гьабегиян, тIубазабулелъулъ къуват кьегиян, щибаб лъикIаб гIамалалъухъ кириги щвезабегиян. Гьезул дугIагун, хъурал къурбанал къабуллъун, иман-баракаталъул ракIал цIун, къабулаб хIежги босун, сах-саламатго хъизан-рукъалде тIадруссагиян.
Гьеб хирияб къоялъ нилъеца жеги гьарула Аллагьасда нилъер улкаялдагун тIолабго дунялалда рекъел букIагиян, рагъ-кьал лъугIагиян. ТIадегIанав БетIергьанасул баракатги гурхIелги киналго муъминзабазда цадахъ букIаги, киналго къварилъабаздаса, зарал-зияназдаса цIунаги.
Хириял диналъул вацал ва яцал! Гьарула ТIадегIанав Аллагьасда нилъер киназулго дугIаби, хъурал къурбанал ва садакъа-хайрат къабул гьабегиян! Амин!
Баркула нужеда Къурбаналъул гIид!
