Баркула кIалбиччанкъо
Баркула кIалбиччанкъо
КIалбиччаялъул гIидалда хурхун ДРялъул муфти АхIмад-афандиясул барки
Ассаламу гIалайкум ва рахIматуллагьи ва баракатугьу!
ХIурматиял вацал ва яцал! РакI-ракIалъго баркула нужеда кIалбиччаялъул байрам. КIал кквеялъул моцI рагIалде щвараб гьаб байрамкъо цIакъго кIвар бугезул цояб буго. Дунялалъулго бусурбабаз тIубараб моцIалъ ракъи-къечги хIехьон, сабруги гьабун, Аллагьасе шукругин реццги гьабулаго, лъикIалщинал гIамалазда тIадчIун тIобитIана гьаб моцI. Нужер гIемерисезги, гьаб заманалъул захIмалъиялде балагьичIого, хIалкIвараб садакъа-хайрат гьабун, рес бугебщинаб лъикIлъиялда гъорлъ гIахьаллъи гьабуна.
Аллагьас къабул гьабеги киназулго, гьелдаса жеги цIикIкIун тIадеги кьеги щивасе. Гьаб моцIалъ батIи-батIиял миллатазул гIадамаз, цохIо Дагъистаналда гуребги, гьеб бахун къватIибги гьарулел ифтIаразда ва цогидалги лъикIал рахъазде жидерго буголъи харж гьабиялъулъ гIахьаллъи гьабуна. Гьелдаса цIакъ кIудияб рохел буго. Щайгурелъул гьединал мажлисал гIадамал цолъизариялъе, гIагарлъи хурхинабиялъе гуребги жидерго ватIаналдехун ва цогидаб халкъалдехун рокьи бижизабиялъе кIудияб сабаблъун ккола.
Цойидеги данделъун диналъул ва цогидалги церечIарал кIвар бугел масъалаби дандраялъ щулалъизарула рухIиялгун хьвада-чIвадиялъул гIамал-хасиятал. РикIкIен гьабун бажарулареб шукругун рецц буго БетIергьанасе гьал хириял къоял нилъеда рихьизе кьурав. Аллагьасда дица гьарула тIаде-тIадеялъулги гьадинаб рахIматалдаса нилъ махIрум гьаругейин абун. Я, БетIергьан Аллагь, къабул гьаре нижер кIалал, сахI ва киналго лъикIал гIамалал. Дуда гьарула, БетIергьан, нижее сабруги, гIакълуги, тавпикъги кьеян гьаб моцIалъ гьабуралда гIей гьабун чIечIого цогидал моцIазги жеги цIикIкIун лъикIлъаби гьаризе.
ГурхIулев Аллагьасда гьарула гьаб моцIрол хIурматалъе гIоло нижер мунагьал чурейин ва киналгIаги рагъал-кьалаздаса ва цогидалги балагьаздаса цIунагиян! Гьаб захIматаб заманалда киназулго ракIазе сабруги щулияб иманги кьеги!
Амин!
