ХIабшадерил мажлис

ХIабшадерил мажлис

Цолъи буго жакъа бусурбабазе гIолареб жо. Нилъ цолъиялъулъ буго къуват ва щулалъи. Щаклъи гьечIо, нилъ данделъиялъулъ бугеб пайдаялдаги.

Гьединлъидалин ТIадегIанав Аллагьас I Къуръаналда абураб: «Нужеца Аллагьасул I дин ккве ва рикьуге», - ян. Гьеб ахIиялда гъоркь ХIабщиб росулъ тIобитIана мажлис. ГIахьаллъи гьабизе аскIор ругел росабалъа ва муфтияталдаса гьалбалги рачIана.

Мажлис байбихьана Къуръан цIалиялдаса. Хадуб кIалъазе вахъана ЧIикIаб росдал имам Муслим. Муфтиясул кумекчи Идрис Асадулаевас бицана халкъалда гьоркьор тIиритIулел ругел унтабазул, хасго лъазабуна нилъерго лъималазухъ халгьабеян ва гьезие кколеб исламияб лъай кьеян. Жакъа къоялъ нилъеда бихьулеб буго лъималазул кколел балагьал. Лъаялъги ва лъикIаб тарбиялъги кIола гьел цIунизеян абуна гьес.

Гьединго кIалъана Къадар росдал имам Муса Жаватхановги. Гьес бицана гьудуллъиялъул хIакъалъулъ. ТIад вугев чиясухъ гIенеккизе кколеблъиялъул бицана муфтияталъул Буйнакск районалда бугеб рухIияб лъай кьеялъул отделалъул нухмалъулев ГIабдуллагь Сахаватовас.

Гьелде инкар кколезе бачана Къуръаналъул аят: «Нуж мутIигIлъе ТIадегIанав Аллагьасе ва аварагасе ва нужеда тIад тарал чагIазе», - ян абураб. Цинги байбихьана спортивиял къецал. Бергьаразе кьуна шапакъатал.

ШАМИЛ МУХIАММАДОВ