Баркалаялъул кагъат
Ниж ккола Саратов шагьаралда яшав гьабун ругел дагъистаниял. Россиялъул цогидал регионаздаго гӀадин, нижер гьанирги рукӀуна Дагъистаналъул Динияб идараялъ «Ас-салам» газета халкъалъухъе щвезабизе, дагӀват гьабизе рачӀарал газеталъул вакилзаби. Гьединаздасан ккола Шамил районалъул Ругъелда росулъа МухӀаммадов Шамил-хӀажиги.
Гьес областалдаго «Ас-салам» газеталда хурхараб гуребги, бусурбабазе пайда цӀикӀкӀарал ишал гӀемер гьаруна. Хириял моцӀал, къоял, сардал рихьун гьес тӀоритӀана мавлидал, Къуръан цӀалиялъул, салават битӀиялъул, суалал-жавабазул ва цогидалги баракатал данделъаби. Гьединго Шамил-хӀажица кьуна Къуръан цӀалиялъул ва какил арканал дурус гьариялъул дарсал.
Дарсазде хьвадизе рес рекъечӀелги гьес рокъо-рокъовеги хьвадун рехун течӀо. Лъаларо хъизан-лъималазде вуссине гьесул замангӀаги кида хутӀулеб букӀарабали. Шамил-хӀажидаса кӀудияб пайда щвана нижее ва гьесдаса кутакалда разиго хутӀана. Ниж гӀадин Аллагьги разилъаги гьесдаса.
Гьев вуго берцинаб гӀамалалъул, гӀодове виччарав, хӀеренав, хӀалимав, нечарав, варагӀ бугев, жиндаса чиясе пайда цӀикӀкӀарав, гӀелмуги лъалев, гьелда гӀамалги рекъарав гӀолохъанчи. Нижее бокьун буго Шамил-хӀажил эбел ХӀафсатие ракӀ-ракӀалъулаб баркала загьир гьабизе, къисматалъ тӀаде ккараб лъимал хьихьиялъул захӀмалъиги баччун, магӀна бугев, гӀамал берцинав, исламияб тарбия бугев вас гӀезавуралъухъ. Нижеца рикӀкӀуна Ругъелда росдалго чӀухӀилъун кколин Шамил-хӀажи. Росдал жамагӀаталдасаги Аллагь разилъаги.
