ХIажаталъув ватарав ГIали
ЛъаратIа росу
«Нилъергоанищ чи, чорхолъго анищ рухI» абурал рагIабазул магIна бичIчIула къваригIел ккун хIажалъи тIубазе хIалае чи щоларого хутIараб мехалда. Хасго гьединав чи ватизе бокьула чияр ракьалде ккедал.
Москваялда къваригIел тIубазе хIалае чи ватана ХIажиев Сайпулагьидаги. ГIурус ракьалда гIумру гьабун вукIарав инсул вац къадаралде щун, Сайпулагьие хIажат букIана гьев гIагараб росулъе восизе ва киналго хварасда хадур гьаризе кколел хIукъукъал тIуразе чи.
Гьеб киналъулго ургъел тIаса босизе хIалае, хIуби гIадин аскIов эхетизе ватана, Дагъистаналъул муфтияталъ витIун Москва областалъул Истра шагьаралда имамлъун чанго соналъ хIалтIулев вугев нижерго районалдаса (ЛъаратIа район) ХIасанов ГIали.
ГIалил гIаданлъиялъулги гIадамазе гьабулеб кумекалъулги гIемер рагIун букIана. Руго гьесие щварал шапакъаталги, баркала загьир гьабурал кагъталги, хIатта Истра шагьаралъул бетIерас ва Дагъистаналъул муфтияталъ кьуралги.
РагIун гуребги бихьизеги рес щвана нижее, ХIажиевазул тухумалъе, ГIалил гIаданлъиялъулги гIадамазе бугеб кумекалъулги. Жаназа чуриялдаса байбихьун кинабго кколебщинаб хIалтIи гьабуна ГIалица. Дагъистаналде ине машинаги балагьана гьес. Нухда къваригIараб-тараб ккани букIине живго цадахъги вилъана. Хварав абадияб рокъове тIовитIун хадуб гурони тIадвуссунги инчIо.
ГIалие гьеб гIадатияб ишлъун букIун батаниги, гьес гьабураб кумек нижеда гIумруялъго кIоченаро. Аллагь разилъаги гьесдаса, гьесул тIалабалдалъун нижее рес щвана щибго квалквал ккечIого инсул вац гIагараб ракьалде восизе.
