Аварагасул ﷺ асарал - Шамилхъалаялда
Аварагасул ﷺ асарал - Шамилхъалаялда
КIиго имам жанив вижараб тIалъи,
ТIагьал асараца асир гьабичIищ?
ШаргIалъул нух цIунун хвалчен борхарал,
Расулуллагьасде данде рахъинчIищ?
ГIемераб бихьарал мугIрузул тIогьал,
Бихьизе щваралда щаклъун ратула.
Цингиги, рорхатал кьурул гIусазда,
ХIабибасул махI чIван чIухIун ратила.
Шамилил цIар кьураб берцинаб хъала,
Хириял гьалбазе дандчIвай гьабичIищ?
Гьаб дунял къалъарав Аварагасул ﷺ,
Асарал рещтIанин духъе лахIзаталъ.
Дагъистан сверулел руго асараз,
Алжаналъул гIадаб махIги тIибитIун.
ТIагьал заман буго цебе тIамулеб,
Азарил соназул гъварилъудасан.
Дагъистан ракьалда баракат бекьун,
РекIее рокьулел руго гьоболлъухъ.
Гьал мугIрузда тIасан свериги бахъун,
РакIал руго цадахъ рахъун росулел.
Гьал рещтIун щваралъур тIугьдул тIегьала,
ТIагьал махIалъ кодоб босула тIалъи.
Гьижра гьабулелъул ансараз гIадин,
ДандчIвайги гьабула, рохун дир халкъалъ.
Расулуллагь ХIабиб ﷺ алхIамдулиллагь,
Аллагьас нижее мун витIаралъухъ.
Цингиги каранда кIудияб рокьи,
Дудехун бикьизе нижей кьуралъухъ.
