Тохтурзабазул баркала
ХIурматияв ДРялъул муфти, шайих АхIмад-афанди ГIабдуллаев!
МахIачхъалаялъул Сепараторазул поселокалда бугеб №8 поликлиникаялъул тIолабго коллективалъул, гьединго, киналго унтаразул ва нижехъе рачIунезул рахъалдасан ракI-ракIалъулаб баркала загьир гьабулеб буго дуе, дур тIадегIанаб рухIияб хъулухъалъухъ, иман лъуразул къваригIелазде кIвар кьолеб букIиналъухъ, нижер поликлиникаялъул сверуда какил рукъ гьабизе дуца гьабураб кумекалъухъ.
Нижер медучреждение ккола шагьаралда бищунго кIудиязул цояб. Гьеб рахъалъ нижер хIалтIухъабазда ва гьенире рачIунезда гIемер дандчIвалаан хIалтIул заманалда как баялъул масъала. Нижецаго байбихьун букIана гIарац бакIаризе ва гьитIинабго как балеб рукъ гIуцIизе, амма нижер гьединаб гъира букIин лъайдал, нужеца бихьизабуна гьеб лъикIаб иш нужедего тIаде босун унго-унгояб бахIарчилъи ва цогидазул тIалаб-агъаз гьабиялъулаб бербалагьи.
ХIакъикъаталдаги, нужеца гьеб иш тIаде босаралдаса, нижер клиникаялъе унго-унгояб берцинаб, киналго санагIалъаби жанир чIезарураб какил рукъ щвезе гIемераб заман къваригIинчIо. Гьенир руго как базе хIажаталщинал санагIалъаби: бихьиназеги руччабазеги батIи-батIиял рукъзал, какичурулеб бакI, лъабго хIажатхана гьездаго гьоркьоб сакъатал гIадамазе хасабги.
ТIадегIанав Аллагьас къабул гьабеги гьеб, дунялалдаги ахираталдаги нус-нус нухалъ цIикIкIун кириги гьабеги. БетIергьанас мун цIунаги, сахлъи щула гьабеги, халатаб гIумру кьеги. Амин!
КIудияб хIурматгун, №8 поликлиникаялъул хIалтIухъабигун гьенире рачIунел.
