Баркалаялъул кагъат
«Ас-салам» казият гьоркьобккун бокьун буго ракI-ракIалъулаб баркала загьир гьабизе лъикIав муъминчи, Къуръаналъул мугIалим КъурбангIалиев МухIаммадгIарипие.
Анкьабилеб июлалда МахIачхъалаялда рарал цIадазул хIасилалда, дир яцалъул рокъобе кIанцIана лъим. Гьелъул хIасилалда яцалъул рукъалъе ккана кIудияб зарал, азбаралде чвахараб лъеда цадахъ бачIана хIари, гIисинаб гамачI.
Гьениб бищун цеве нижее хIалае щвана мажгиталде какиде ун тIадвуссун вачIунев вукIарав МухIаммадгIарип. Нижерго гIагарлъи тIаде щвезегIан гьесги, гьесул хъизан Хадижатицаги гIемераб хIалтIи гьабун батана. Сваканги ратилин, нужергоги гьабулеб иш гьечIого батиларин нухда регIулел рукIаниги, гьел кIиялго ахирисеб хIалтIи гьабун лъугIизегIан нахъе инчIо.
Гьединлъидал, гьаризе бокьун буго гьел сахаватав муъминзабазе кIиябго рукъалъул талихI, Аллагьасул разилъи, БетIергьанас насиб гьабеги гьел кIиязего лъикIабщинаб ва гIумруялда баракат лъей.
Гьедин, къваригIаралъуб цоцазе кумек гьабулел сахаватал гIадамал рати дица рикIкIуна бахIарчилъун. МухIаммадгIарипил васалги руго инсуда релълъарал, хIажалъи ккарасда аскIор рахъун чIолел. Гьездаса кидаго вохун хутIаги мун, МухIаммадгIарип.
