Кирилъун батаги

Кирилъун батаги

ГIисакъ НурмухIаммадов гьавуна ЛъаратIа районалъул УхIада (Гъведиш) росулъ.

Гьев вуго унго-унгояв хIалтIухъан, къваригIаралъув ватулев багьадур. Гьев кидаго хIадурго вукIуна ахIаралъуве ине. ХIалтIудаса хIинкъуларев чи вуго ГIисакъ. Гьединго гьев гIадамазда лъала динияб хIаракатчилъиялъул цебесеб кьерда вугев муъминчи хIисабалдаги. ГIисакъида кибго, кидаго батула хIалтIи гьабизе, киве щваниги камуларо гьесул гIадамазе гьабулеб кумекги.

Мажгиталда хурхунги гьабула жамагIаталъе пайдаял ишал. Гьев сахаватав муъминчияс жиндирго рахъалдаса УхIада росдал хабзалалъ хвел-хоб тIобитIиялъе хIажат бихьун гьабуна кIудияб тIадхъел. Гьелъухъ росдал жамагIаталъ гьесие кьолеб буго баркала, Аллагьасул рахъалдасан бугеб кириги ГIисакъие кидаго хутIила.

Реццалъе мустахIикъав,
Къадру-къимат цIикIкIарав.
Росу-жамагIаталъе,
Къуркьи гьечIев бахIарчи.
Мажгит-къулгIа къачIазе,
Къойилго квер битIулев.
Къварилъи кканщинасе,
ХIалае вахъун чIолев.
ХIалухъин бакIарулеб
Заман тIаде бачIиндал,
ХIалхьи-рахIат щвечIого
ГIаламалъе ватулев.
Щуябго лъимералъе
Динияб гIамал кьурав.
Иманалда ругьунал
ЛъикIал ясал лъугьарав.
Исламалде гьитIинго
Рокьи бижарав инсан.
«Ас-салам» газеталъул
ЦеветIурав мухбир, мун. 

Аллагьас ﷻ ГIисакъ сахлъиялда тайги, тавпикъги къуватги кьеги.

ПАТIИМАТ АСИЛДАРОВНА