Иманалъул даражаялда бугеб
«Сабру гьабиялдалъун нижее гьаб дунялалда бищун лъикIаб щвана», - ян абураб рагIи буго ГIумар асхIабасул. Чиясул гIумруялда сабру гьабиялъул даражаялъе къимат кьезе захIмалъила. Гьеб буго къуватаб гIамал, жинца захIмалъаби раччизе, гьабулеб ишалъулъги битIараб хIукму гьабизе, берцинаб гIамалалъул нухде инсан вачине ва унго-унголъун цIодоравлъун, гIакъилавлъун вукIине кумек гьабулеб.
Гьеб буго рухIияб ва жанисеб рахъалъ къуватав чиясул тIабигIат. Щайин абуни, жанисеб рахъалъ загIипав чиясда ццим бахъараб заманалда напс къинабизе ва сабруялда чIезе кIоларо, кIваниги захIмалъула. Гьелъ буго сабру гьабулезе БетIергьанас I жазаъги кIудияб гьабулеб бугеб. Къуръаналдаги сабруялъул хIакъалъулъ нусгогIанасеб бакIалда рехсей гьабун буго. Гьеб буго Аллагьасе бокьулеб гIамалги.
Гьедин рехсон буго «Алу-ГIимран» сураялда «Аллагьасе сабру гьабулел рокьула», - ян. Жеги буго: «Нужеца сабру гьабе, Аллагь сабру гьабулелгун вуго», - ян («алАнфал», 46 аят).
Гьеб буго жидедалъун киналниги аварагзаби ратIа рахъараб гIамал. Алжаналъул кIул гьебин абиги киназего машгьураб буго. Аварагасда цо-цояз щиб жо кколеб иманилан абидал, гьес абун буго: «Иман буго сабру гьаби», - ян. Цоги хIадисалда буго: «Сабру гьабиялъ иманалъулъ, бетIералъ къаркъалаялъе гьабулебго гIадаб бакI ккола, (бетIер гьечIони къаркъала тIубалареб кинниги), сабру тIагIани иманги уна», - ян. Сабруялъул бищун лъикIабги буго, жиндие зарал гьабурасе данде тамихI гьабизе кIолебги букIаго, Аллагьасе гIололъун тIаса лъугьун тей. Гьелъул хIакъалъулъги аварагас абун буго: «Бищун дие бокьулеб гьекъолеб жоялдаса буго, ццим бахъинги къотIинабун, сабруялъул гьекъей. Ццим бахъин къинабурав чиясул ракI Аллагьас иманалъул цIезабила», - ян.
Сабру гьабизеги ккола бищун Аллагьасде гIагарал, Гьесие гIибадатгIамалалда ругез. Гьелдалъун гIемерал аварагзабазул хIалги бихьана. Тирмизияс бицараб хIадисалда буго: «Аллагьасе цо чагIи рокьараб мехалъ, Гьес гьезул хIалбихьиял гьарула. Бихьаралда разилъи гьезул бугони, Аллагьасул разилъиги щола гьезие. Ццим бахъун, сабру тIагIун лъугьани, Аллагьасул ццим бахъинги щола», - ян.
Абу-Малик ал-АшгIариясдаса бицараб хIадисалда буго: «Сабру буго нур, (жиндалъун гьелъул бетIергьанасул хоб гвангъизабулеб)», - ан. Аллагьас нилъ гьареги сабру гьабулел, бихьаралда шукру бугел, гьабулеб гIамалалъулъ рацIцIадал лагъзаллъун!
Амин!
МУХIАММАДГIАРИФ КЪУРБАНОВ, «АС-САЛАМАЛЪУЛ» МУХБИР
