Гiалимзабазул бухьен
Исламалъул гIалимзабазул бухьен букIана шаригIаталъул имамзабазулгун ва машгьурал суфизабазулгун. Масала, АбухIанифа кидаго гIодов чIолаан ГIабдуллагь ибну Мубарак, Фузайл, Давуду ТIай гIадинал машгьурал суфизабазул мажлисазда. Имам АхIмадги Суфян бину ГIуяйнатги хьвадулаан МагIруфул Кархиясухъе.
ШАМИЛ МУХIАММАДОВ, «АС-САЛАМАЛЪУЛ» МУХБИР
Имам АхIмадица АбухIамзат алБагъдадиясда гьикъулаан пуланаб суалалъе жаваб щибилан. Имам АхIмадица кIудияб къиматги къадруги гьабулаан Бишрул ХIафи абулев машгьурав суфиясул. Ибну Касирица «ал-Бидаят ва Ннигьаят» тIехьалда кутакалда веццун вуго «ГIаварифул магIариф» абураб тасаввуфалъул тIехь хъварав машгьурав суфи ГIумар Сагьраварди.
Ибну Сурайж вукIана ШафигIияб мазгьаб рекIехъе лъалев, лъабабилеб гIасруялъул мужадид. Гьев Жунайдул Багъдадиясул мажлисаздеги хьвадулаан. Имам ШафигIияс жиндаго бичIчIулареб жо Шайбану РрагIиясда гьикъулаан.
АхIмадил мазгьабалъул бищун чIахIиял имамзабазул цояв Ибнул Къуддамат ГIабдулкъадир Гиланиясул мурид вукIана. ГIалимзабазул султIанин дунялалдаго машгьурлъарав ГIиззубну ГIабдуссалам АбулхIасан Шазалиясул мурид вукIана.
Фикъгьи, хIадис-гIелмуялъул тIолго бусурбабазул имам Навави Ясин Маракишиясул мурид вукIана. Исламалъул хIужжа имам Гъазали Юсуфу Нассжилги АбугIали Равзабартиясулги мурид вукIана. КIудияв имам, исламияб тарихалъул гIалимчи ибну Халдун ГIиса ибну Заятил мурид вукIана.
ГIакъаидалъул имам, 30 томалда Къуръаналъул тафсирал хъварав Фахру Арразияс МухIидин ибнул ГIарабиясда цIехолаан жиндаго ричIчIичIел жал. ХIанапи мазгьабалъул тIолго бусурбабаз мугъчIвай гьабулел тIахьал хъварав машгьурав имам ибну ГIабидин Халидшагь Багъдадиясул мурид вукIана.
Ункъабго мазгьаб рекIехъе гIадин лъалев, кIинусгониги гIелмудул тIехь хъварав ГIабдул Вагьгьаб ШагIранияв ГIалиюнил Хавасил мурид вукIана. Исламалъул бищун чIахIиял гIалимзабазул цояв АхIмад ибнул Мубарак ГIабдул ГIазиз Даббагъил мурид вукIана. Киналго хъвани, халалъиялда хIинкъун, гьалда гIей гьабун тела. ГIакълу гьечIев инкарчиясе халат гьабиялъ пайдаги кьоларо.
