Рамазаналда хасаб
Рамазаналда хасаб
Рамазан моцIалъ гьаризе рекъарал гIибадатаздасан ккола Къуръан цIали. ГIадамазе нухмалъилъун букIине ва гьел хIакъикъияб, битIараб нухде тIоритIизе рамазан моцIалъ рещтIана хирияб Къуръан. Гьелъие нугIлъи гьабуна Къуръаналда бугеб аяталъ: «Рамазан буго Къуръан рещтIараб моцI», - ян (сура «ал-Бакъара», аят 185).
Имам ШагIбияс абуна: «Къуръан рещтIине байбихьана Лайлатул къадриялъул сордоялъ», - абун. Аллагьасул ﷻ расулас ﷺ абуна: «Ибрагьим аварагасде СухIуфал рещтIана рамазан моцIрол авалаб сордоялъ. Муса аварагасде Таврат рещтIана рамазаналъул анкьго къо араб мехалъ. ГIиса аварагасде Инжил рещтIана рамазаналъул анцIила лъабго къо араб мехалъ. Къуръан рещтIана рамазаналъул къоло ункъо къо араб мехалъ», - абун.
Къуръан цIали хирияб букIин бицунел хIадисал:
– «Къуръан цIаларав чиясда ракIалде ккани жиндие гьелъухъ кьуралдаса цIикIкIун цоги чиясе кьунин абун, гьев вуго Аллагьас ﷻ тIадегIан гьабураб жинца гьитIинаблъун гьабурав».
– «Нужер бищун лъикIав Къуръан лъазе гьабурав ва гьеб цогиязда малъарав вуго».
– «Къиямасеб къоялъ Къуръан цIалулезул эбел-инсул бетIералда лъола бакъ гIадин жиб гвангъулеб таж».
– «Къуръан цIалулесул мисал буго хIавагIечалъул мисал, жиндаса берцинаб ва гьуинаб махI бачIунеб» (АхIмад).
– «Къуръаналъул жого ургьиб гьечIев, ай щибго жо ракIалдасан лъаларев яги гьеб цIализего лъаларев чи чIунтIараб рукъалда релълъун вуго».
– «Къуръан цIалулев релълъарав вуго утружатида, жиндир махIги берцинаб, тIагIамги гьуинаб».
– «Щив чи вугониги жинца Къуръан цIаларав ва гьелда рекъон гIамалги гьабурав, ТIадегIанав Аллагьас гьесул эбел-инсуда лъела къиямасеб къоялъ ботIрода таж, дунялалда бугеб бакъудасаги жиндир кунчIи берцинаб».
– «Нужеца Къуръан цIале, хIакълъунго, гьеб бачIине буго гьелъул агьлуялъе кумекалъе къиямасеб къоялъ».
