Нужер бищун лъикIав…
Нужер бищун лъикIав…
ХIурматиял бусурбаби, гъоркьехун кьолел руго «Нужер бищунго лъикIав…», - абун Бичасул аварагас ﷺ байбихьи гьабурал хIадисазул магIнаби.
– Нужер бищун лъикIав - жинца Къуръан цIализе лъазабурав ва гьеб цогидаздаги малъарав вуго. (Бухари)
– Нужер бищун лъикIал - жидер тIабигIат-гIамал берцинал руго. (Бухари)
– Нужер бищун лъикIав - жинца берцинго жо тIадбуссинабулев вуго, ай налъи яги къарз. (Бухари)
– Нужер бищун лъикIав - жиндир хъизан-агьлуялъе лъикIав вуго. (ИбнухIиббан)
– Нужер бищун лъикIав - жинца цогидазе тIагIам кьурав ва гIадамазда гьоркьоб салам тIибитIизабурав вуго. (ЖамигI)
– Нужер бищун лъикIав - жиндаса лъикIлъиялде хьулги бугев, жиндаса квешлъи бачIиналдаса божиги бугев чи вуго. (Тирмизи)
– Нужер бищун лъикIав - гIадамазе пайда бугев вуго. (ЖамигI)
– Нужер бищун лъикIал - как балаго жидер гъажибетIер хIеренал, ай аскIор ругезе хъачIлъи гьечIел руго. (Таргъиб)
– Нужер бищун лъикIал - жал рихьиялдалъун Аллагь ракIалде щолел руго. (Таргъиб)
– Нужер бищун лъикIав - гIумруги халатав гIамалги берцинав чи вуго. (ЖамигI)
– Нужер бищун лъикIав - жиндир бацIцIадаб, Аллагьасукьа хIинкъулеб ракIги, битIараб бицунеб мацIги бугев чи вуго. (Ибну Мажагь)
– Нужер гьудулзабазул бищунго Аллагьасда цеве лъикIав - жиндир гьалмагъзабазе бищунго лъикIав вуго.
– Нужер мадугьалзабазул бищун лъикIав - жиндир мадугьалзабазе бищунго лъикIав вуго. (Тирмизи)
– Нужер бищун лъикIав - питнаби ругеб мехалда жиндир чол чIолорхъжоги ккун, тушбабазда хадувги ун, гьел хIинкъизарулев яги гьездаса хIинкъи-зарал щолев вуго. Яги живго жиндаго гIалахалда батIаго чIун, жинда тIад лъураб Аллагьасул хIакъ тIубалев вукIунев чи вуго. (ЖамигI)
– Нужер имамзабазул бищун лъикIал - нужее гьелги, гьезие нужги рокьулел руго. (Муслим)
– Нужер цIаразул бищун лъикIаб - ГIабдуллагь ва ГIабдурахIман буго. (Муслим)
ГIабдуллагь МухIаммадов
