«Ас-саламалъул» байрахъ
Казбек районалъул Калининаул росулъ бугеб «Орхидея» абураб банкетазулаб залалда тIобитIараб тадбиралда гӀахьаллъана районалъул бетӀер ХIажимурад Мусаев, ДРялъул муфтияталъул северияб округалда вугев вакил МухӀаммад Мукъошдибиров, районалъул имамзабазул советалъул председатель АхӀмадрасул Качалаев, МахӀачхъалаялъул аслияб мажгиталъул имам ва хасаб рагъулаб операциялъул гӀахьалчи ГӀиса Салимсултанов ва ЧIикIаб росдал имам Ибрагьим ИсмагӀилов.
Данделъи тIобитIиялъе гIиллаги букIана араб соналда жаниб районалда гьабураб хIалтIул ва гьаризе ругел ишазул бицин.
КӀалъазе рахъараз бицана районалъул жамгӀияб, рухӀияб гӀумруялъулъ диниял хӀаракатчагӀаз лъураб бутӀаялъул хIакъалъулъ.
«Инсан» фондалъул хIаракаталдалъун гьарурал тадбирал рехсана ва рихьизаруна тематикиял видеороликал.
Гьеб дандеруссиналъул аслияб лахӀзатлъун ккана Казбек районалъе «Ас-салам» газеталъул хьвадулеб хасаб байрахъ кьей.
Дагъистаналъул киналго муниципалитетазда гьоркьоб бищунго цӀикӀкӀараб подписка букӀиналъ районалъе щвана гьеб шапакъат.
