Дагъистаниязул кумек
«Инсан» фондалъ Сириялъул халкъалъе гьабураб квербакъи
Сириялдагун Турциялда ккараб ракь багъариялъул хIасилалда кIудияб къварилъи ккаралъул, гIемерисел улкабаз гьел пачалихъазе кумек гьабуна. Гьеб рахъалъ нахъе къан чIечIо «Инсан» фондги. Гьелдаса хадубги Сириялъул гурхIел-рахIмуялъулал фондаздасан ахIи бачIана жеги кумек хIажат бугин абун. «Инсаналъ» кумек гьабизе рагIиги кьуна.
Гьеб киналъулго хIакъалъулъ бицун нижеца гара-чIвари гьабуна рехсараб фондалъул вакил Абубакаров Насруллагьилгун.
- Цо сордо-къоялда жаниб бакIарана 13 миллионгIанасеб гIарац ва къокъабго заманалда гьелъул къадар 31 миллионалде бахана, - ян бицана Н. Абубакаровас. - Сириялъул посольствоялдасан хIажатаб къайиялъул хъвай-хъвагIай тIалаб гьабуна ва гьеб гIарцухъ босана 60 тонна хIажатаб къайиялъул. Масала, лъималазул квен, ретIел, пиринчI, макаронал ва цогидалги нигIматал, хIатта гIисинал лъималазе памперсалцин. Гьеб кинабго Сириялде щвезабизе транспорталъул рахъалдасан кумек гьабуна Дагъистаналъул бетIер Сергей Меликовас. ПалхIасил, къайи-цIа Сириялда бугеб Россиялъул рагъулаб базаялде щвезабуна. Гьенисан бикьана сверухъ ругел бакIазде.
- Кумек гьабиялъе Сирия тIаса бищиялъе гIилла щиб ккараб?
- Турциялде дандеккун Сирия буго мискинаб пачалихъ. Турциялъе кумек гьабулел улкаби гIемерал рукIана. Нижеца хал-шал гьабидал, Сирия цIикIкIун хIажатаблъун бихьана кумекалъе. Гьенир кумек гьабулелги хасгьабун Россиялъул рагъулал хъулухъчагIи рукIана.
- Гьаб казият гьоркьобккун баркала лъие кьелеб?
- Баркала кьела Дагъистаналъул бетIер Сергей Меликовасе. Баркала буго Сириялда ругел нилъер улкаялъул рагъулал хъулухъчагIазе. Гьединго баркала буго кумек гьабиялъулъ гIахьаллъи гьабунщиназе.
