Суннаталъулъ буго къуват

Какилъ суннат бугин абун цоцояз кIвар гьабичIого тола чанго жо. Нилъер щаклъи гьечIо суннат тIубани какил кири цIикIкIунеблъиялда ва гьелда жаниб бугеб рухIияб къуваталда. Гьединлъидал как мухIканаб букIунаро нилъеца суннатал тIурачIони.

Ахирисеб «АттахIийяту» цIалун Аварагасде ссалатги битIун хадуб салам кьелалде цIализе суннатлъулеб дугIа буго:

«Аллагьумагъфир ли ма къаддамту ва ма аххарту ва ма асрарту ва ма агIланту ва ма асрафту ва ма анта агIламу бигьи минни анталь мукъаддиму ва анталь муаххиру ла илагьа илла анта астагъфирука ва атубу илайка», - абун.

МагIна: «Я, дир Аллагь, Дуца дир церехун гьаруралги хадур гьаризе ругелги мунагьал чуре, балъго гьаруралги тIатун гьаруралги чуре, гIорхъолъа борчIун исрап гьабурабги чуре, дида лъалареб Дуда жиб лъалебги чуре, Мун Дуе бокьарав цеве ккезавулев (тIадегIан гьавулев), Дуе бокьарав нахъе ккезавулев (гIодовегIан гьавулев) вуго. Мун гурони жиндие лагълъи гьабизе бегьулеб щибго жоги батун гьечIо, дир мунагьал чуреянги гьарула дица Дуда, дун Дудехунги вуссуна (тавбу гьабун)».

Хадубги абила: «Я мукъаллибал къулуби саббит къалби гIала диника».

МагIна: «Я Жиндие бокьухъе ракIал сверизарулев Аллагь, Дуца дир ракI дур диналда чIезабе».

Хадубги абила: «Аллагьумма инни заламту нафси зулман касиран кабиран ва ла ягъфиру ззунуба илла анта фагъфир ли иннака антал гъафуру ррахIим».

МагIна: «Я, дир Аллагь, дица дирго напсалъе гIемераб кIудияб зулму гьабуна. Мунагьалги Дуца гурого чуруларо, Дуца Дудаго аскIоса (Дур рахъалдаса) дир мунагьал чуре, Мун дидаги гурхIа, Мун цIакъ гурхIулев вуго».

Хадубги абила: «Аллагьумма инни агIузу бика мин гIазаби жагьаннама ва мин гIазабил къабри ва мин фитнатил масихIи ддажжал».

МагIна: «Я, дир Аллагь, дица Дудалъун цIуни тIалаб гьабула жужахIалъул гIазабалдасаги, хабал гIазабалдасаги, хвалилгун чIаголъиялъул питнаялдасаги, масихI дажалил питнаялдасаги».

Гьаб ахирисеб дугIа цIакъ кIвар цIикIкIараб ккола. Гьеб цIалеян кьучIаб хIадисалда амруги бачIана. ТIадеги, батIаго как балев чиясги, имамасда хадув вугев чиясги, гьес салам кьун хадубги дугIаби цIикIкIинаризе бегьула.

«АттахIийятуялъул» ахиралда дугIа гьабичIого тезе карагьатаб буго. КIиго ракагIаталъ имамасдаса кватIун как бухьарав маъмумас тIоцебесеб «АттахIийят» цIалун хадубги гIадада вуцIцIун чIечIого «Кама ссалайта», гьелда хадур гьарулел дугIабиги цIализе суннатал руго.

ШАМИЛ МУХIАММАДОВ «АС-САЛАМАЛЪУЛ» МУХБИР