Гьикъизе нечараб, бицине намусаб

Кинаб тIаса бищилеб?

ШаргIалъ тIад гьабураб как-кIал гIадал парзазда хадуб хIалалаб боцIимал тIалаб гьаби бусурбанчиясда тIадаб буго.

Щуго соналъ цебе щуйилазда университет лъугIизабуна дица. Гьеле гьебгощинаб заман ана махщалида рекъараб хIалтIи щоларого. Гьал къоязда лъикIаб харж щолеб хIалтIи щвана. Амма дун хIалтIизе восараб компаниялъ къватIибе биччалеб буго шаргIалда рекъон хIарамаб продукция, ай гIаракъи ва тамахьо. Гьелдаго цадахъ гьалмагъас гIакълу кьолеб буго хIалалаб дурго бизнес гьабизе лъугьайилан. Гьеб иш дихъа бажариларин абураб хIинкъиги буго. Щиб тIаса бищилебали лъаларого дунги вуго.

Пайзула, Гъизилюрт район.

ГIалимчиясул жаваб

Хирияв аварагас абуна: «ХIалалаб ризкъи тIалаб гьаби хутIарал парзазда хадуб парз буго», - ян (Байгьакъи).

ШаргIалъ тIад гьабураб как-кIал гIадал парзазда хадуб хIалалаб боцIи-мал тIалаб гьаби бусурбанчиясда тIадаб буго. Бусурбанчияс хIалалаб боцIи тIалаб гьабизе ккола, амма гьеб налъи цогидал парзазда, ай исламалъул щуябго рукнабазда бащалъуларо. Гьеб налъи тIубазе ккола къойил чарагьечIого гьелде хIажатас, масала, хъизан-агьлу хьихьизелъун ва гьелда релълъараб.

Амма рес бугел чагIазе ризкъи тIалаб гьаби тIадаблъун букIунаро. ТIадегIанав Аллагьас боцIи-мал бижун буго инсанасул хIажат тIубан хутIараб заман Аллагьасе гIибадаталъе биччазелъун букIине. Кваназе ва гьекъезе гьечIони, гIибадаталъе рухI букIунарелъул. Гьединлъидал абизе бегьула инсанас хIалалаб ризкъи тIалаб гьабиялъул аслиябго мурад Аллагьасе гIибадат гьаби бугин. Дур суалалъе жаваб кьолаго абила, хIарамаб жо гьабулеб бакIалда хIалтIизе хIарамаб букIуна.

Хирияв аварагас абуна: «Аллагьасул нагIана буго мехтизарулеб жоялъе, гьеб гьекъолесе ва гьекъезабулесе, гьеб бичулесе ва бичун босулесе», - ян (Абу Давуд, Ибн Мажагь, Ал-ХIаким)

Гьанибго рехсезе бегьула ГIалиасхIабасул ккараб лъугьа-бахъинги. Цо къоялъ мажгиталъуве лъугьунаго как бан бахъинегIан пуланав чиясухъе кьола чу кквезе. Мажгиталъуса къватIиве вачIиндал жибго чуги тун гьелда тIад букIараб чIолохъжоги босун ун ватула гьев. Цинги кIиго диргьамги кьун ГIали-асхIабас чапар витIана базаралде цIияб чIолохъжо босизе. Базаралде вачIиндал ГIалиасхIабасул чIолохъжо бикъарасда тIаде ккола чапар. Гьесухъа кIиго диргьамалъухъ чIолохъжоги босун, чапар тIадвуссуна.

Цинги ГIали-асхIабас абуна: «Сабру гьечIолъиялъ цо-цо гIадамаз хIарамаб боцIухъ босула къайи. Аллагьасукьа хIинкъун сабруялда рукIаралани гьебго къайи хIалалаб боцIухъ босизе кIолаан гьезда», - абун.

Психологасул жаваб

БитIараб нух тIаса бищизе дудаго лъалеб батула, амма божилъи гIолароо вуго мун. ШаргIалда борцинчIонигицин гIакълу бугев чиясда лъала чорхое зарал бугеб жо гьабизе бегьулареблъи. Гьедин инсанасе зарал гьабулел жал къватIире риччалеб бакIалда хIалтIиялъ бичIчIизабула чияе кколеб заралалдаги нилъ разияллъун рукIин.

Кин бугониги чияе зарал гьаби яхIалъ къабул гьабуларо. Гьединаб бакIалдаса щвараб гIарцудаги баракат лъоларо. ГIемер рагIула абулеб хIарамаб хIалтIудаса щвараб гIарац кибе арабали лъачIого тIагIанин абун. Дуе лъикIаблъун бихьизабураб хIалалаб хIалтIуде божилъи гьечIони, гьебги гьабичIого тезе бегьула. ЛъикIаб рукIарахъиналъул чагIаз бицуна хIалтIул авалалда цIакъ гIемерал захIмалъаби раччизе кканин. КIвар бугеб жо буго хIалтIул нухда битIараб, намусаб, хIалалаб рахъ тIаса бищи.

Цогидазда цIехезе санагIат гьечIел суалал нужер ратани, ритIизе бегьула редакциялъул гьаб 7 988 458 16 63 номералде. Гьезие гIалимасулгун психологасул жаваб кьела гьаб гьумералда.

ХIАДУР ГЬАБУНА ЖАБИР МАЖИДОВАС