Гьикъизе нечараб бицине намусаб
Гьикъизе нечараб бицине намусаб
ЗахIматай яс йиго...
Дир йиго гIун ячIуней яс. Гьелъулгун хабар рекъезабизе цIакъ захIмалъула. Гьанже кIиабизе дун рукъалде индал, жеги тIадеги хIехьезе кIолареб гIамал лъугьун буго. Дир цIияв росгун дагIбадула, гьевгун кIалъаларо, жиндирго рокъове гьев виччаларо ва щиб кканиги инсухъе гIарзалъ уна. Гьеб сабаблъун дир гьанже вугев росасул, цеве вукIарав росасулгун къецги ккола.
Дагьалъ цебе ясалъ дида абуна инсуца кьолел алиментал жинхъе кьеян. Жеги гьелъие къваригIараб босичIого цониги жо тунги букIинчIо дица, кваназе квен буго, кьижизе бакI буго ва ретIине ретIел босула. Щиб гьелъие къваригIун бугебали бичIчIулеб гьечIо. Гьелъие кьолеб тарбиялъулъ мукъсанлъи ккун батила дихъа. Кин гьеб иш рукIалиде бачIинабилеб?
Аслипат, МахIачхъала
ГIалимчиясул жаваб
ГIун рачIунел лъималазулгун хабар рекъезабизе захIмалъулин абураб жо битIараб буго. Гьелдаго цадахъ халгьабизе ккола лъимадул рукIа-рахъиналъул, гьудулзабазухъ ва сунде руссун ругелали.
ХIехьезе кIолареб гIамал лъимадул бугониги, гьеб хIинкъизабун ва гIайибал чIван тарбия кьеялъ лъикIалде рачунаро. Хирияв Аварагас ﷺ абуна: «Лъимал кIодо гьаре ва гьезулгун гьоркьоблъи лъикI гьабе», - ян. (Ибн Мажагь)
Мун гьелъул эбелги йигелъул, хIаракат бахъе сундулъго ясалъул рахъ кквезе, гьелъулгун гьоркьоблъи батизе, гьелъие гьудуллъун йикIине. Дур гьанже вугев рос гьелъие махIрамиявлъун лъугьаниги, гьесул ихтияр гьечIо гьелъул рокъове лъугьине ва хасго гьелъул изнуги гьечIого. Гьанже вугев росасда ва ясалъул инсуда бичIчIизабе, яс сабаблъун дагIбадизе бегьулареблъи ва ясалъул захIматаб заман гьеб бугеблъи.
Эбел-инсул рецц-бакъалде кидаго хIажатал рукIуна лъимал. Гьединлъидал цо гьитIинаб лъикIаб гIамал гьелъ гьабуниги, кIудияб жо гьабурабгIанги ецце. Еццулелъубги хIалица гуреб, ракI-ракIалъ, амма гIорхъолъа ун рецц-бакъги гьабуге. Лъимадуда ккезе рес буго гьей ялъаргъулей йигин абун.
Ясгун цадахъ заман тIаме, гьейгун кIалъай, тукабазде цадахъ яче ва лъикIай гьудулалдехун гIадин ургъел бикье. Гьелъул инсуца кьураб гIарацги сунда тIад хвезабун лъикIилан абун гьелда дандбай. Гьелъулгун гьоркьоблъи батизе кIвани, хутIарал суалал жалго тIуразе руго.
Ясалъул динияб рахъалдеги кIвар кьезе ккола. Дурго мисалалдалъун бихьизабе кин гIибадат гьабизе кколебали.
Психологасул жаваб
ТIоцебесеб иргаялда, тарбия кьеялъулъ мукъсанлъи ккун бугин абураб жо пикрабалъа бачахъе. Дудаго гIайибчIваялъ лъикIалде рачунаро. ГIайибал чIвачIого гьеб иш битIараб мухъде бачиналда тIад ургъе.
Бищун цебе бичIчIизе ккараб жо буго лъималазул балугълъиялъул гIуж гьезулгун гьоркьоблъи батизе захIматаб букIин. Сверухъ ругезда гьеб бичIчIунгутIиялъ рачуна дагIбадиялде. Гьединлъидал гьейгун кIалъалелъуб гьелдехун бугеб адаб бихьизабе, кIудияй, ай 20 сон барай ясгун кIалъалей гIадин йикIа. Гьедин гьабуни, кватIичIого нужгун дагIбади гьелъ тезе буго ва гьелда бичIчIила нужеца гьейги рикIкIуней йикIин.
Дурго росасдаги абе ясалъулгун гьоркьоблъи лъикI гьабиялде цIакъго кIвар кьогейилан. Рес буго гьесул тIадчIеялъ ясалъул рекIелъ гьесдехун тушманлъи цIикIкIине. Цинги гьей жеги цIикIкIун рикIкIалъизе йиго. Гьесул адаб ясалъ гьабизе буго, дур хIурмат гьес гьабулеб бугебгIан мехалда жаниб.
ХIадур гьабуна Жабир Мажидовас
Цогидазда цIехезе санагIат гьечIел суалал нужер ратани, ритIизе бегьула редакциялъул гьаб +7 988 458 16 63 номералде. Гьезие гIалимасулгун психологасул жаваб кьела гьаб гьумералда.
ЦIар ва адрес хисизабун кьезе буго бачIараб суалалъе жаваб!
