Гьикъизе нечараб бицине намусаб
Гьикъизе нечараб бицине намусаб
Сабру кин гьабилеб?
Росас байбихьана криптовалюта абулеб жоялда тIад гIарац гьабизе, ва хIиллачагIазул къорикьеги ккун, бащдаб миллион гъурущ хIурудахъ ана. Гьебги букIана мина къачIазе ва гьеб гIатIид гьабизе цIакъ хIажатаб гIарац. Гьеб сабаблъун росги ургъаликье ккана ва дидаги гьарула тIаса лъугьаян абун. Дида гьев вичIчIула, гьесие бокьун букIиндалха лъикIаб иш гьабизе. Амма рокъоб дагIба кканщинахъе гьебги ракIалде щун, ццим бахъинчIого дунги хутIуларо. Кин дица сабру гьабилеб?
ПатIимат, МахIачхъала
ГIалимчиясул жаваб
Анасидасан бицана аварагас ﷺ абунин: «Адамил лъимал гъалатIал кколеллъун рижун руго, амма гьезул бищун лъикIал тавбу гьабулел руго», - ян (ибн Мажагь, Тирмизи).
Тавбуялъул каваби инсанасе кидаго рагьарал руго ва ТIадегIанасе рокьула мунагьалда ракI гурхIун, тIаса лъугьаян тавбу гьабун гьардолел гIадамал.
Дунялалъул щиб захIмалъи росасде бачIаниги, чIужу йикIине ккола гьесул мугъчIвалеб бакIлъун. ЗахIмалъи тIаде бачIиндал лъала рос-лъадул цоцадехун бугеб рокьиги хинлъиги. Гьелъул магIна кколаро, мунагь бугеб жо гьабулев росасе кумек гьабеян абураб. Гьелъул гIаксалда, йикIине ккола гьединал пишабаздаса рос нахъе ахIулей, насихIат гьабулейлъун.
Росасда гIайибал чIвазе ихтияр гьечIо, гьабуралда ракI бухIун гьес тавбу гьабун бугелъул. ХIиллачагIазда божун, къокъабго заманалда жаниб гIемераб гIарац щвезе бокьиялъ, рос гуккун вуго. Хьул буго гьеб мисал гьесие дарслъун букIинин абураб. Аллагьасе шукру гьабизе ккола, гьеб куцалда тамихI гьабун гьеб мунагьалда даимлъиялдаса жив цIунаралъухъ. Нилъер гIумруялда жаниб кколеб лъикIаб ва квешаб ТIадегIанав Аллагьас ﷻ хIалбихьизелъун битIараб буго. ЗахIмалъи-къварилъиялда сабру гьабун чIеялъ Аллагьасул ﷻ разилъиялде рачине ресги буго. ЗахIматаб гIужалъ гьесда аскIой йикIун, гьесул ракI батулеб рагIи бице. Гьев гIодове виччазавун абе, захIмалъиялда хадуб бигьалъиги бачIунин абун.
Тарихалде раккани, нилъеда бихьула щивав бахIарчиясда нахъа сабру бугей, гьединайго бахIарчияй лъади йикIин. Масала, халкъалъулго сайид МухIаммадил ﷺ аварглъиялъул байбихьуда, гIагаралцин жиндаса руссараб мехалда, тIоцебе гьесул ракI батизабурай гIадан Хадижат йикIана.
Психологасул жаваб
ГIарцудаго цадахъ хъизамги биххизе биччангутIи буго гьабсагIаталда нужер аслияб масъала. Росасда бичIчIун буго ккараб гъалатI. Рокъоб дагIба-рагIи ккедал, гьесда лъазе буго бокьараб мехалда хIиллачагIаз гуккун, хъизан гIарцудаса махIрум гьаби дуца бадибчIвазе бегьулеблъи. Гьедин кколеблъиги лъан, рекIелъ бугеб рахIатхвеялъ, гьес хIаракат бахъизе буго кинабго дудаса бахчизе. Дудаги гьеб бичIчIила ва мунги гьесдехун цIорон лъугьина. Гьеб хIалалда нужер гьоркьоблъиги къойидаса-къойиде хвезе буго. Цинги цо къоялъ росас ццим загьир гьабизе буго. Гьеб мехалъ хIинкъи буго хъизам биххиялда. Аллагьас цIунаги! Гьединлъидал, бищун битIараб букIина цебе арабги кIочене тун, бачIунеселда гьединал гъалатIал ккунгутIиялда тIад хIалтIаби гьаруни. ГIарацги буго жакъа букIунеб, метер букIинчIого букIине рес бугеб жо. Рос-лъади рекъон ругони, гIарацги, лъикIаб гьоркьоблъиги букIина, хъизамалда баракатги лъела.
