Рибаялъул баркатбахъи
ХIурматиял бусурбаби, «Инсан» фондалъул баяналда рекъон, гIезегIанго дандчIвалел руго процентал кьезелъун чияхъа гIарац босарал яги банкалдасан лъикIаланго кIудияб къадар гIарцул кредиталъеги босун кIуди-кIудиял налъабакье ккун жидее кумек гьарун фондалде рачIунел гIадамал. ХIакъикъаталдаги гьеб ккола рибаян жинда цIар БетIергьанас лъураб даран. Гьебги буго налъуда пуланаб къадар гIарцулги босун, нахъе кьолелъул гьелдаса цIикIкIун кьеялъул къотIиялда гьабулеб даран.
Гьеб какун Къуръаналда буго гьадинаб аят: «Ва гьал иман лъурал гIадамал! Нужеца кванаге рибаялдалъун щвараб боцIи-мал. Нуж ТIадегIанав Аллагьасдаса хIинкъа гьеб кваназе, нужго Аллагьасул ццин бахъиналдасаги гIазабалдасаги цIунараллъун хутIизе», - ян («Алу-ГIимран», аят 130). Гьединаб хIинкъи кьолеб буго Аллагьас гьеб ишалде гъорлъе лъугьунесе.
Гьелъул хIакъалъулъ свалат-салам лъеяв Аварагас абуна: «ТIадегIанав Аллагьас рахIматалдаса рачахъана риба кваналев, ай гьеб хIалтIизабулев чи, гьес кьураб кваналевги, рибаялъе нугIлъи гьабуравги, гьелъие кагъат, ай къотIи хъваравги, гьеб жинца хIалал гьабуравги», - ян. Хал гьабе, бусурбаби! Иблис гIадин БетIергьан Аллагьас жив рахIматалдаса хъамулев пиша-гIамал кин хIалтIизе гьабулеб гIакъилав чияс?
Цоги абулеб буго: риба босулев чиясул садакъа, закагIат, гъазават, ай жигьад, хIеж ва как ТIадегIанав Аллагьас къабул гьабуларо. Свалат-салам лъеяв Аварагасги абун буго: «Бечедал чагIи Алжаналъуре лъугьуна фукъарааздаса щунусго соналъ хадуб», – абун. Гьал бечедал чагIи ккола шаргIияб нухалда гьабураб хIалалаб бечелъиялъул бетIергьаби.
ХIанафияв имамасдасанги бицана: рухI бахъиялда аскIоб иманалдаса ватIалъи гIемерисеб (тавбу гьабичIел) мунагьаздалъун букIуна. Гьедин, чи рухI бахъиялда аскIов иманалдаса ватIа гьавиялде бищунго хехаб мунагь – Аллагьасул лагъзадерида зулму гьаби ккола. Гьединлъидал, ва муъминчи, мун ТIадегIанав Аллагьасдаса хIинкъа, дуца Аллагьасул лагъзадерида зулмуги гьабуге, хIакъ гьечIого гьесухъа боцIи-мал бахъиялдалъун. Гьеб кутакалда кIудияб мунагь ккола. КIодолъи гIеларищ гьелъие рухI бахъиялда аскIоб иманалдаса ватIа гьавизе бищунго хехаб букIин.
ХIакъикъаталдаги зулмулъун ккола жинца кьуралдасаги цIикIкIараб къадар гIарцул нахъе тIалаб гьаби. Гьеб рибаялде гьоркьоре лъугьинго баракат бахъулеб ишлъун букIинго бихьуларищ кумек гьарун гьел «Инсан» фондалде кIанцIи. Гьезул гIемериселги цIакъ чарабухIун, кIанцIизе бакI тIагIараб бакIалде ккун рукIунин бицуна «Инсаналъул» хIалтIухъабаз. Аллагьас нагIанаги кьураб, халкъалда тIад зулму гьабилъунги кколеб, жиндаса баракатги бахъараб пиша тезе нилъер щивасул иманги гIакълуги гIезе ккела.
