Как сунца хвезабулеб?
Какил мухIканлъи лъазабизе щивав чиясда тIадаб буго. Ахираталъул рокъоре щведал, чIорого хутIичIого рукIине. Гьелдаго цадахъ лъазабизе ккола гIумруялда жаниб хIажалъулеб гIелмуги. Гьелдасанги ккола как ва гьелда хурхарабщинаб. Хасго лъазе ккола битIун АлхIам ва АттахIият цIализе, парз суннаталдаса батIа бахъизе.
Как хвезабулел жал чанго руго: какилъ вукIаго какичури биххулел, черх чури тIад гьабулел жал тIаде рачIани: черхалде, ратIлиде, как балеб бакIалде нажаслъи бачIани, какилъ вукIаго бахчизабизе кколеб черхалъул гIаврат загьирлъани, какилъ вугев чиясул керен къиблаялдаса цоги рахъалде буссинабуни.
Къуръан цIали, зикру, дугIа гуреб батIияб кIиго хIарп загьирлъани яги магIна кьолеб цо хIарп загьирлъани, велъулаго, зигардулаго, хъегIдулаго гьел хIарпал загьирлъани, гьеб мехалъги как батIуллъула. ХIарамаб букIин лъачIого, яги кIочон тун, яги кквезе кIвечIого хъегIдизе бачIун дагьаб калам гьабуни (анлъго рагIиялдаса дагьаб), как батIуллъуларо.
Гьединго как хвезабула какилъ тIатIалаго лъабго кIудияб рагъари гьабуни. Мисалалъе, лъабцIул тIатIалаго бетIер хьвагIезабуни, цого заманалда бетIерги кверги багъаризабуни. ЛъабцIул квер багъарани, лъабго гали тIамуни, махсароде абун цо кIудияб багъари гьабуни, как хола.
Щиб бугони кванани, гьекъани, кIал биххулеб, къватIиса ургьибехун бугеб каналалде жанибе щиб бугониги жо ани, как батIуллъула. Масала, гIинзул картIинибе гIучI къазабуни, как батIуллъула.
Какилъ вукIин кIочон тун дагьаб жо кванани как батIуллъуларо, гIемер кванани - батIуллъула. КIалдиб бугеб чакар биун хадуб къулчIани, как батIуллъула. КъватIиса кIалдибе бачIун хадуб хIацIу къулчIани, как батIуллъула. КIалдибго бугеб хIацIу къулчIани - батIуллъуларо. Цабзазда гьоркьоб къараб кванил жо, хIацIугун цадахъ къулчIани, батIаги гьабун къватIибе твизеги бажаричIони, как батIуллъуларо. Какилъ вукIинги кIочон тун, хIарамаб букIин лъачIого ахту къулчIани, яги мукъулукъалда бугеб ахту къулчIун ани, как батIуллъуларо. Дабаздаса баккараб биялъ хъублъизабураб хIацIу къулчIани, как батIуллъула.
ТIагIамалъул букIа, гьуинаб жоялъул букIа кIалдиб хутIараб татугун цадахъ хIацIу къулчIани, как батIуллъуларо. Какичурун хадуб кIалдиб лъим хутIун батани, хIацIугун гьеб какилъ къулчIани, как батIуллъула. Кофеялъ яги цоги жоялъ кьер хисизабураб хIацIу къулчIани, как батIуллъула.
Къилбаялъул рахъалдасан цогидаб рахъалде керен буссинабуни, как батIуллъула. КIочон тун къилбаялдаса вуссун, цинги вуссараб лахIзаталъго цIидасан къиблаялдехун вуссани, как батIуллъуларо. Как гьоркьоб къотIизабизе яги цогидаб какалде сверизабизе абун ният гьабуни, как батIуллъула. Гьединго как батIуллъула черхалъ гьарулел какил рукнабазул цониги рукну бокьун тIаде цIикIкIинабуни, масала, суждаялда нодо гIодоб лъун хадуб гьениса босун цониги бакIалда нодо лъуниги как батIуллъула (суждаялдасаги ворхун гIодов чIун гьабулеб сужда малъичIого).
Махсародего гьумер добе-гьанибе буссинабуниги как батIуллъула. Какилъ бихьинчиясул цIинуялдаса гъоркьехун бугеб рачлихъбакI, цебеса чехь яги нахъаса мугъ загьирлъани, как батIуллъула. ЧIужугIаданалъул рас, габур, махIаби, кверзул рищалаби, хIатIал загьирлъани, как батIуллъула.
Гьединго как батIуллъула какил цониги рукну бокьун гьоркьоб биччани. ЛъачIого гьоркьоб рукну биччан батани, гьеб тIубазабизе ккола. Гьединго как батIуллъула мачуялда масхIу гьабиялъул заман какилъ лъугIани. Как батIуллъула имамасдаса кIиго фигIлияб рукнуялъ цеве ккани яги бокьун кIиго рукнуялъ гIузру гьечIого имамасдаса нахъе ккани. Имамлъун вукIине бегьуларев чиясда хадуб как бухьани, как батIуллъула, как бухьун хадуб нияталъулъ щакдарилаго рукну гьабизегIанасеб заман ани, как биххула.
Какил мухIканлъи гьабичIого тоге. Гьеб цIакъ кIвар бугеб иш буго.
МУХIАММАДНАБИ АХIМАЕВ
