Райондин аьхю мажлис
18-пи январи Табасаран райондин Гьепlил гъулаъ айи «Кавказ» кlуру залиъ «Инсан» фондди тешкил гъапlу аьхю серенжем кlули гъубшну.
Дупну ккундуки, мициб къайдайин серенжем Табасаран райондиъ сабпи ражари кlули гъубшну. Гизафдарин суал шулки, гьаз билетар масу туври мициб серенжем гъапlнийкlан, кlури. Ав, ихь мюгьтаж’вал айидариз кюмек хьуз кlури билетарихъди апlбанди гъахьунхьа. Къайд апlурхьаки, му серенжемдикан халкьдиз аьхю мянфяаьт гъабхьну.
Думу йигъан гьеле серенжем лисундин гъудгнихъан ккебгърайиб вушра сяаьт йицlисабдианмина инсанар зализ гъюз хъюгъю. Серенжем ккебгъайиз гьацl сяаьт ккимиди залиъ учlвуз йишвкьан имдайи. Му мажлисназ СВО-йиъ кечмиш гъахьидарин хпар, дадйиризра теклиф дапlнайи.
Мажлис Мугьяммад-Шафи Аьшуровди гирами Каламдиан аятар урхбиинди ккебгъу.
Уч духьнайидар лап аьшкьниинди «Нашидуль Ислам» дестейин нашидар-мавлидарихъ хъпехънийи. Дугъриданна, залиъ дуснайидарин юкlвар лап разиди вуйи.
Уч духьнайидарин улихь Муфтиятдин ЮТО-йиъ айи полпред Мугьяммад Майранов гъулхну. Дугъу лап яркьуди Ислам диндиъ дишагьлийириз фициб заан фикир тувраш, дурариз фициб заан кьимат тувраш, ктибтну.
УдучIвну апIурайи улхбарин арайиъ бицlидариз вуйи конкурсра тешкил гъапlнийи. Мажлис кlули гъабхурайи Аьгьмад Евпатовди бицlидариз Пайгъамбарин ﷺ уьмрикан суалар туври, дюзи жавабар тувдариз пешкешар тувнийи.
Табасаран райондин имам Ансар Рамазановди чан улхбаъ вари му серенжемдиъ иштирак шулайидариз чухсагъул гъапну ва 2024-пи йисандин гъапlу ляхнин натижа гъивну. Думу натижайиинди Мугьяммад Майрановди Гурихъ гъулан имам Гьяжи халуйиз, дяъват отделин гъуллугъчи Мурад Аслановдиз ва Сиртыч гъулан имам Аьбдурашид Шихбабаевдиз пешкешар тувну.
Улихьнаси райондиъ шубарин арайиъ гирами Каламдин 30-пи жуз урхбан талит гъабхьнийи. Му серенжемдиъ думу талитнан натижйирра адагъну.
Магьа дидин натижйир:
- Ахметханова Марьям (Джульджаг).
- Сулейманова Милана (Дюбек).
- Джабраилова Меседу (Ерси).
- Гасанбекова Сафият (Ляхя).
- Гасанбекова Айша (Ляхя).
Магьа му талитнан натижйир гьамцдар гъахьну. Гъит Аллагьу Тааьла му шубариз дарсар тувдариз ва дурарин абйир-бабариз аьхю савабар дикIри.
«Гьамцдар талитар апlури, серенжемар кlулиз гъахури, ихь жямяаьтдин арайиъ диндин аьгъювалар яркьу апlурхьа. Эгер гьарсар касдин диндин мюгькам аьгъювалар ва иман зади гъабхьиш, халкьдин арайиъ гьюрматра артухъ шул. Му мажлиснан натижа мискинар-факьирариз, ихь фонднан мюгьтаж’валариз ву. Гъит Аллагьу Тааьлайи учву туву садакьа кьабул апlри, гъит ихь арайиъ гьюрмат ибшри ва ихь ватандиъ ислягьвал ибшри», - гъапну Ансар Рамазановди.
Райондин имамди чан терефнаан Ахьитl гъул’ан вуйи Аьбдулхаликь уьмрайиз путёвка тувну. Имамдин гафариинди, дин тарабгъувалиъ, имамариз кюмек апlувалиъ му касди аьхю зегьмет зигура.
Мажлисдин аьхириъ залиъ уч духьнайидарин арайиъра уьмрайиз путёвка ипну ва думу Тlаттил гъулан агьали Султанат халайиз кьисмат гъабхьну.
Гъит Аллагьу Тааьла му мажлис тешкил гъапlдарикан рази ишри, гъит ихь варидарин гележег акуб, яркьуб ва Пайгъамбарин ﷺ рякъюъди гъягъруб ибшри! Амин!
