Хив гъулаъ райондин мажлис
Хив гъулаъ райондин мажлис
Дагъустандин хусусиваларикан саб – диндиз асас фикир туврайивал ву. Мажлисар дагъустанлуйирин уьмриъ кми-кмиди шулайидар ву. Ихь аьлимари Дагъустандин муфтий, шейх Аьгьмад афандийин табшуругъар тамам апlури, кми-кмиди вари шагьрар-районариъ аьхю мажлисар кlули гъахура.
Илмин мажлисарикан аьхю мянфяаьт а. Гьаз гъапиш, инсан саб-кьюб сяаьтнан арайиъ мициб серенжемдиъ дусган, дугъаз имамарин, аьлимарин мелзналан ихь диндикан гизаф мялуматар шулу. Саспи вахтари гьеле гьадрари кlурайиб жвуваз гъеебхьиб вушра, хъанара текрар гъапlган, аьхю мянфяаьт шулу.
Магьа Хив райондин гъулариъра мицдар мажлисар гъягъюра.
Улихьнаси Хив гъулаъ вари райондин аьхю мажлис гъабхьну. Душваз вари гъулариан аьлимарихъ хъпехъуз, мянфяаьт ктабгъуз, ихь диндикан жвуван аьгъювалар яркьу апlуз гизаф инсанар уч духьнайи.
Мажлис кlули гъабхурайир Хив гъулан имам Мансур Везиров вуйи.
Серенжем ачмиш апlури, дугъу сабпи нубатнаан, аьлимари вари чпин ляхнар гъитну, чпин жямяаьт бадали му мажлиснаъ иштирак хьпан чухсагъул къайд гъапlну.
Огни шагьриъ айи Мугьяммад Ярагъийин ччвурнахъ хъайи медресейин директор Мугьяммадаьриф Рамазановди чан улхбаъ хизандин айитl духьну ккуни аьлакьйирикан ктибтну.
«Хизан Аллагьу Тааьлайи жилириин илипнайи ляхнарикан ву. Жвуван хпир, веледар ухьу заан дережайиинди Ислам диндин къанунарихъди дюуьрхну ккунду. Гьяйифки, саспидариз му ляхнарикан аьгъдар. Гьадму аьгъдрувалиан хизандиъ аьхю читинваларра шулу. Гьаци вуйиган, гьюрматлу ватанагьлийир, сабпи нубатнаан, гъачай ихь Пайгъамбарин ﷺ рякъ бисухьа. Гъачай Пайгъамбари ﷺ хизандин гьякьнаан фу кlураш, лигухьа. Фукьан ухьу яшамиш гъахьишра, аьхир саб ву – Аллагьу Тааьлайихьна хътакувал. Аллагьу Таьлайихьна ухьу марцциди хътакбан бадали, сабпи нубатнаан, жвувхъан ва жвуван хизандихъан хъюгъну ккунду. Жвуван ва жвуван хизандин диндин къайда гужал дапlну ккунду. Гьаци гъабхьиш, ихь аьхиратра ужуб шул» - гъапну Мугьяммадаьриф Рамазановди.
Мягьячгъалайин имам Шамилин ччвурнахъ хъайи мистан имам Мугьяммад Сулеймановди чан улхбаъ мусурман касди тамам дапlну ккуни диндин къайдйирикан, мусурмнарин арайиъ дубхьну ккуни чвевалиан ва Аллагьу Тааьлайиз багахь вуйи агьларихьна вуйи гьюрматнакан яркьуди ктибтну.
«Гъи читин вахт ву, гьюрматлу мусурмнар! Саспидар жвуваз диндин аьгъювалар гъадагъбахъ хътар, хъа илим дурхну, дяъват апlурайидарин гъалатlар агури лицбахъ хъа. Дурарихъ сарун жара ляхин хътар, чпин уьмриъ жвуву варитlан ужуб ляхин апlурайганси гьебгъра. Хъа дурариз аьлимарилан, имамарилан, илимлу агьларилан, Аллагьу Тааьлайиз ккуни лукlарилан улхуб хъанара чlуру ляхнарикан вуйиб аьгъдар. Гьаз? Гьаз гъапиш дурариз чпин дин аьгъдар, диндин гьюкмар мялум гъахьундар. Диндикан аьгъю касдиз мялум вуки, тмуну касдилан улхуз хай шулдар. Эгер шулуш, уж’вал апlин, шулдарш - манигъвал мапlан. Эгер увхьан диндин ляхнариъ иштирак хьуз шулдарш, мянфяаьт тувуз шулдарш, зараркьан мутуван. Уву апlурайи футнайиинди аьхю зарар хурава. Кьан дарапlди му ляхнарихьан ярхла йихьай. Аллагьу Тааьлайи дидхъан аьхю аьзаб тувуз мумкин ву», - гъапну Мугьяммад Сулеймановди.
Аьлимарин улхбарин арайиъ бицlидари назмар-нашидар гъурхну.
Мажлиснан аьхириъ варидари сатlиди Палестинайиъ айи мусурмнарихъан ва гьацира читин гьялнаъ айи вари мусурмнарихъан дюаь гъапlну.
Гъит Аллагьу Тааьлайи ухьуз мицдар мажлисар артухъдиси кlули гъахуз кюмек туври. Гъит вари мусурмнар гьякь рякъ’ин муддам апlри! Амин!
