ГьепIил гъулаъ аьхю мажлис

ГьепIил гъулаъ аьхю мажлис

21-пи авгъустдиъ Табасаран райондин Гьепlил гъулан «Гуш» дагъдиин гьарйисан апlру нубатнан мажлис кlули гъубшну. Му майднар улихь вахтари аьрабар яшамиш шули гъахьидар ву. Мидин лап аьхю тарих айиб ву.

Гьаддиз Гьепlил гъулан жямяаьт гьарйисан саб ражари гьадушв’ин гъулан мавлид - мажлис апlури шулу. Мажлис ачмиш апlури, Гьепlил гъулан имам Аьбдуллагь Аьлиевди сабпи нубатнаан дуфнайи хялариз ва гъуландариз му мажлисдиъ иштирак хьпан чухсагъул къайд гъапlну. Гьацира гъулан имамди бицlиди му йишван тарихдикан ва тахминан фуну девриъ мушваъ аьрабар яшамиш шули гъахьнуш, ктибтну. Мажлис Абдулла Эфендиевди гирами аятар урхбиинди ачмиш гъапIну.

Мажлис кIули гъабхурайи райондин имамарин Советдин председатель Ансар Рамазановди уч духьнайидариз хизандиъ ислягьвал хьуваликан, чибчпихъди духьну ккуни аьлакьйирикан ктибтну. Райондин имамди уч духьнайидариз асас фикир гъийин йигъан саб жюрейин аьгъювалар адру, амма фунуб вушра диндин суалназ жаваб тувру агьларихьан ярхла хьуб ккун гъапIну. «Шариаьтдин аьгъювалар адарди, далил адарди диндин суалариз жаваб тувуз хай шулдар. Амма гъи бязи инсанари, чпиз аьгъювалар адар дарипри кIури, суал тувган, чпин фикир вуйиганси жаваб туври шулу. Дици хай шулдар ва дицдарихьан ярхла духьну ккунду», - гъапну райондин имамди. Гурихъ гъулан имам Гьяжи халуйи ва ЖагътIил гъулан имам Гьясаняли халуйи чпин улхбариъ гирами Мугьяррамдин вазликан ва гьацира гъудгнин жикIруган шид фици ишлетмиш дапIну ккундуш гьаддикан ктибтну. Гьяжимурад Аьлиевди уч духьнайидариз аьрабар фу вахтна мушваъ яшамиш шули гъахьнуш ва гьацира му гъалйирин мяналуваликан яркьуди ктибтну. Мажлисдиъ гьацира улихьнаси райондиъ гъабхьи «Благонравие праведников» кIуру китабдин талитнаъ гъалиб гъахьидариз пешкешар тувну.

Думу конкурсдиъ сабпи йишв Сертил гъулан агьали Закир Идрисовди гъадабгъну. Дугъаз сабпи йишв гъадабгъбан 50 000 манат пешкеш тувну. Кьюбпи йишв Ерси гъулан агьали Камил Гьясановди гъадабгъну (30 000 манат) Шубубпи йишв - Гьесихъ гъулан агьали Камил Аьбдуллаевди (20 000 манат). Талитнаъ гьаму ксари заан натижйир улупну ва гьацира Мягьячгъала шагьриъ шлу финалин этапдиъ иштирак гъахьну. Мицдар мажлисарикан жямяаьтдизра, имамаризра ва ихь жигьил насларизра аьхю мянфяаьт а. Гъит Аллагьу Тааьлайи гьарсар касдин туву садакьа, гъапIу ибадат ва дюъйир кьабул апIри, гъит ухьуз, ихь хизанариз берекет, шадвал ва бахтар артухъ ишри! Амин!

ИЛЬЯС АЬБДУЛЛАЕВ