Пайгъамбариз ﷺ гюрюш мажлисар
Ассаламу аьлайкум, гьюрматлу ватанагьлийир! Магьа Пайгъамбар ﷺ бабкан гъахьи гирами Раби уль-аввалин ваз улдубчlвну. Му вазлин муддатнаъ ихь аьхю уьлкейин жюрбежюр шагьрар-районариъ, Пайгъамбарин ﷺ уьмрикан ктибтури, аьхю мажлисар кlули гъушну.
Москва шагьур
Сентябрин 17-пи йигъан Москва шагьриъ табасаранлуйирин аьхю серенжем кlули гъубшну. Душваъ аьлимари Пайгъамбарин ва Дугъан асгьябарин уьмрикан ктибтури, мавлидар гъурхну.
Уч духьнайидари чпиз аьгъдру суалар гьерхри, жвуваз диндин аьгъювалар гъадагъури гъахьну.
Дупну ккундуки, аьхиримжи йисари Москва шагьриъ йисандин арайиъ кьюб ражари табасаранлуйирин серенжем шулу. Саб Рамазандин вазли, тмунубсана - Раби уль-аввалин вазли.
Гьамци вахт-вахтарик душваъ айи табасаранлуйир сатlи духьну, саб серенжемдиъ иштирак хьуваликан аьхю мянфяаьт а.
Гъит Аллагьу Тааьлайи му ляхин тешкил гъапlдариз варидариз аьхю савабар туври! Амин!
Мягьячгъала шагьур.
Раби уль-авваль вазлин Пайгъамбар ﷺ бабкан гъахьи 12-пи йигъан Мягьячгъала шагьрин кlулин мистаъ варидагъустандин аьхю серенжем кlули гъубшну. Душваъ Дагъустандин муфтий, шейх Аьгьмад Афанди, РД-йин правительствойин председатель Абдулмуслим Абдулмуслимов ва гьацира имамар-аьлимар, жямяаьтлугъдин вакилар иштирак гъахьну.
Мажлисдиъ гьарсар вяз-насигьят туврудари Пайгъамбари ﷺ ухьуз гъибту аьхю насликан, асгьябарин ва табиинарин рякъкан ктибтну.
Гьарсаб насигьятнан кьяляхъ назмар-мавлидар урхуйи ва мажлиснан аьхириъ вари мусурмнарихъан дюаь гъапlнийи.
Гъит Аллагьу Тааьлайин амриан мицдар мажлисар хъанара артухъ ишри.
Табасаран ва Хив районар
Табасаран ва Хив районарин саки вари гъулариъ мажлисар гъахьну. Гьарсаб жямяаьтди чпин гъуландарихъди Пайгъамбариз ﷺ бахш вуйи мажлисар гъапlну.
Гъул-жямяаьт думу мажлисариъ аьшкьниинди иштирак шули гъахьну, гьаз гъапиш варидариз му мажлисариз чпин хизандиланмина садакьа тувуз, ужуб дюаь апlуз ккундийи. Магьа гьамци му мажлисар разивалиинди ва хъуркьувалариинди кlули гъушну.
Гъит Аллагьу Тааьлайи ухьуз хъанара артухъ ихь Пайгъамбар ﷺ ккун апlуз мумкинвал туври. Гъит Аллагьу Тааьлайи ухьуз дугъан шафааьтнаканра туври! Амин!
Гъурбан Шябанов
