Жулжагъ гъулаъ цlийи мист ачмиш гъапlну

Жулжагъ гъулаъ цlийи мист ачмиш гъапlну

27-пи авгъустди Табасаран райондин Жулжагъ гъулаъ цlийи мист ачмиш апlбаз бахш дапIнайи аьхю серенжем кlули гъубшну.

Мажлисназ жюрбежюр йишвариан инсанар уч духьнайи.

Мажлис шейх Ибрагьим аз-Зуйбайжийи гирами Каламдиан аятар урхбиинди ачмиш гъапlну.

Дугъу чан уткан сесниинди аятар урхбиинди инсанарин кlваъ аьхю асар  ипну.

Жулжагъ гъулан имам Руслан Аслановди чан ва жямяаьтдин терефнаан вари дуфнайи хялариз му гирами мажлиснаъ иштирак хьпан аьхю чухсагъул гъапну. Гьацира имамди жямяаьтдиканра гьамци гъапну: «Гьюрматлу жямяаьтар! Магьа гъи ихь цlийи мист ачмиш апlурахьа. Му ухьу вари сатlиди жалб духьну тикмиш гъапlу мист ву. Гъит Аллагьу Тааьлайи ухьу гьарсари туву садакьйир, гъапlу ужувлан ляхнар кьабул апlри, гъит гьарсаб хизандиъ берекет, шадвал ва бахтар ишри».

Имбу мажлис кlули гъабхуз Табасаран райондин имамарин регьбер Ансар Рамазановдиз гаф тувнийи.

«Гъи Жулжагъ гъулаъ Аллагьу Тааьла рази шлу серенжем кlули гъябгъюра. Мицдар шаду ляхнар арайиз хури ухькан гьарсари жвуваз ахиратдиз ужувлар гьязур апlурахьа. Аьхю вуйи чухсагъул гъулан имам Руслан Аслановдиз. Му касди, жямаьтдин улихь гьучlвну, гирами мист вахтниинди ачмиш апlуз гизаф зегьмет гъизигну. Гъит му мистаъ гафнииндира, дакьатарииндира иштирак гъахьи гьарсарикан Аллагьу Тааьла рази ишри. Гележег акуб ва шадуб ибшри. Му мистаз дуфну ухьуз артухъси ибадат апlузра Аллагьу Тааьлайи кюмек туври», - гъапну Ансар Рамазановди.

Гъулан советдин регьбер Шагьимерден Гьясанаваевди чан терефнаан мистаз пешкеш тувну.

«Ихь советдиъ магьа гъи уткан мист ачмиш апlурахьа. Ихь жямяаьтдин кьувватниинди гьамциб уткан мист арайиз дуфна. Аьхю вуйи чухсагъул ихь гъулан имам Руслан Аслановдиз! Мицдар ляхнариз му кас лап кlубан ву. Гьацира гьаму гирами мистаъ ади Аллагьу Тааьлайикан гьамусяаьт ихь гьюкуматдихъан женгнаъ айи жигьиларра сагъ-саламатди багъри ватандиз гъюб ккун апlураза» - гъапну Шагьимерден Гьясанаваевди.

Мажлиснаъ уч духьнайи аьлимар жюрбежюр месэлйирикан удучIвну гъулхну.

Избербаш шагьрин имамарин советдин председатель Аьбдулла Салимовди веледариз ужуб тербия тувну ккунивалин гьякьнаан яркьуди ктибтну.

Лак райондин имамарин советдин председатель Мугьяммад Майрановди чан улхбаъ гъийин йигъан жигьилари интернетдиъ айи саспи инсанарихъ хъпехъури фици гьякь рякълан улдугураш ва ухьуз Пайгъамбари ﷺ фициб рякъ дивнаш, дидкан мялумат тувну.

Абйир-бабар аьгъяди хьуб, яшлуйирихьна гьюрмат ва бицlидарихьна рягьимлувал дубхьну ккунивалин гьякьнаан Хазар гъулан имам Къурбан Рамазановди ктибтну.

Аьбдуррагьим Тlагьировди чан насигьятнан гафариъ мистар тикмиш апlувалин заанваликан ва мистариъ жямяаьт гъудган апlувалин фазилатнакан яркьуди ктибтну.

Йемендиан вуйи шейх Ибрагьим аз-Зубайжийи гирами Калам урхбакан вуйи хайирнакан, думу аьгъю апlувалин гьякьнаан яркьуди ктибтну.

Аьлимарин вязйирин арайиъ Йемендиан вуйи гьяфиздин бай Муътазди уткан нашидар гъурхну.

Гьацира му серенжемдиъ бицlидариз вуйи диндикан суалар тувру талит кlули гъубшнийи. Думу талитнаъ суалариз жаваб туву бицlидариз пешкешер гьязур дапlнайи.

Мажлиснан аьхириъ Муфтиятдин терефнаан Жулжагъ гъулан имам Руслан Аслановдиз чухсагъул кlуру кагъаз ва хилихъ хъапlру сяаьт тувну, хъа мистаз гъудгнарин вахтар улупру аьхю сяаьт багъиш гъапIну.

Думутlанна гъайри Асланов Аьликеримдиз, Ражабов Ражабдиз, Асланов Айдиндиз, Ашурбеков Талибдиз, Ахметханов Рягьимхандиз, Асланова Кезбандиз, Рамазанова Селиматдиз ва Гюловарин хизандиз дагъустандин Муфтиятдин терефнаан чухсагъул мялум апIурайи кагъзар тувну. Му ксари мист тикмиш апlувалиъ асас зегьмет гъизигну.

Гъит Аллагьу Тааьла варидарикан рази ишри, гъит хъуркьувалар ва ужувлар артухъ ишри. Му мист, ибадат апIури, инсанарихъди абцlуз кюмек туври! Амин!

Ильяс Мутелимов