Рабиуль авваль 2021.Натижйир

Рабиуль авваль 2021.Натижйир

Ассаламу алейкум, гьюрматлу ватанагьлийир! Магьа му Рабиуль аввалин вазра ихь арайиан гъубшну. Улихь йисанси му йисанра, гьяйифки, вари дюн’яйиъ абхънайи чlуру уьзриан лап аьхю серенжемар гъахуз мумкинвал гъабхьундар.

Рабиуль авваль 2021. Натижйир

Ассаламу алейкум, гьюрматлу ватанагьлийир! Магьа му Рабиуль аввалин вазра ихь арайиан гъубшну. Улихь йисанси му йисанра, гьяйифки, вари дюн’яйиъ абхънайи чlуру уьзриан лап аьхю серенжемар гъахуз мумкинвал гъабхьундар. Амма гьаци вушра, ихь ватанагьлийири чпин мистариъ, хулариъ уч духьну, Пайгъамбарин ﷺ тяриф хъапlри гъахьну. Гьамци Пайгъамбарин ﷺ уьмрикан аьгъю апlури, Аллагь ﷻ зикир апlури, му ваз адапlну.

Гьямд ибшри Аллагьу Тааьлайиз, му йисан ихь табасаран халкьдинра жюрбежюр йишвариъ серенжемар кlули гъушну.

Москва шагьур

Октябрин аьхириъ Москва шагьрин «Муллык» кlуру ресторандиъ табасаран халкьдин серенжем кlули гъубшну. Душваъ Москвайиъ яшамиш шулайи ихь табасаранлуйир иштирак гъахьну.

Дурариз вяаьз-насигьят апlуз кlури му мажлиснаъ Дагъустандин муфтиятдин фетвйирин отделин руководитель Мугьяммад-Рамазан Ражабов, Дербент райондин дяъват отделин руководитель Ризван Гьябибов, Хив райондин имам Шябан Салихов, Огни шагьриъ айи медресейин мялим Аьбдулмалик Мягьяммедбеков ва гьацира жарадар иштирак гъахьну.

Аьлимари уч духьнайидариз гирами Пайгъамбарин ﷺ уьмрикан яркьуди ктибтну. Серенжем кlули гъабхурайи Мугьяммадрасул Абакаровди уч духьнайидарин арайиъ, Пайгъамбарин ﷺ уьмрикан вуйи суалар туври, конкурс гъапlну. Суалариз яркьуди жаваб туври, аьгъдрударизра ачухъ апIури, му серенжем заан дережайиинди кlули гъубшну.

Му мажлиснаъ иштирак гъахьи ихь ватанагьлийириз аьхю чухсагъул пуз ккунди ачуз. Гъит ихь варидарин гележег ужуб ибшри! Амин

Санкт-Петербург

27-пи октябриъ Санкт-Петербургдин «Дагъустан» кlуру культурно-просветительский центриъ гьарйисан кlули гъябгъру табасаранарин мажлис гъабхьну. Му шагьриъ яшамиш шулайи табасаранар йисан кьюб ражари Дагъустандиан гъюру аьлимариз ккилигури шулу. Аьдат вуйиганси, Рабиуль аввалин ва Рамазандин вазлиъ ихь аьлимар душну, му шагьриъ яшамиш шулайидариз диндикан цlиб яркьуди ктибтури шулу.

Магьа му йисанра му шагьриз диндин илмарин доктор Рашид Аьлимурадов, Хив райондин имам Шябан Салихов ва Дербент райондин дяъват отделин руководитель Ризван Гьябибов гъушну.

Мажлисназ дуфнайидари чпиз аьгъдру месэлйир ахтармиш апlури, чиб-чпихъди таниш шули, табасаран халкьдин сабвал улупну.

Мици заан къайдайиинди му серенжем тешкил апlбан Санкт-Петербургдиъ яшамиш шулайи ихь баяриз аьхю чухсагъул.

Псков-Новгород

Улихь йисари Санкт-Петербургдиъ ихь халкьдин серенжемар кlули гъахруган, багахь хьайи Псков ва Новгород шагьраринра ихь вакилар илтlикlури шуйи.

Магьа му йисан му шагьрариъра табасаранлуйирин серенжемар кlули гъахуз мумкинвал гъабхьну.

Му шагьрариъ айи ихь вакилари хялар лап ужуди кьабул гъапlну ва мистариъ-хулариъ мавлидар-мажлисар кlули гъухну.

Му шагьрариъра хайирлу серенжемар кlули гъахувал гьар йисандин къайда шул кlури, ижмиди умуд киврахьа.

Гъит Аллагьу Тааьлайи чпин вари ужувлан ниятар кьабул апlри.

Табасаран район

Му вазлин муддатнаъ Табасаран райондиъ гьарйигъан саб-кьюб серенжем шули гъахьну.

Аьхю гъуларихъан хъюгъну, бицlи гъуларихъна шли мистаъ, шли гьяятдиъ му серенжемар апlури, му ваз заан дережайиинди адапlну.

Му мажлисар кlулиз адагъу гъуларин имамариз аьхю чухсагъул, дурари дугъриданна халкь бадали, жямяаьтдин сабвал бадали аьхю зегьмет гъизигну.

Эгер халкьдиз йисандин арайиб сабкьан гьамциб мажлис апlурдарш, дурарин диндин тереф лап зяиф шул.

Хъа мицдар гирами вазар ухьхьан гьичра мажлисар адарди, илимдикан улхру серенжемар адарди гъитуз шулдар.

Гьаддиз варидариз му мажлисар тешкил апlбан, мушваъ иштирак хьпан аьхю чухсагъул.

Аллагьу Тааьлайи гьарсарин ният кьабул апlри! Амин!

Хив район

Хив райондинра кми-кмиди гизаф гъулариъ Пайгъамбариз ﷺ гюрюш вуйи мажлисар кlули гъушну.

Му мажлисариъ Пайгъамбарин ﷺ уьмрикан ктибтури, бицlидари назмар урхури, сариз аьгъюб тмунуриз ктибтури, заан дережайиинди му ваз адапlну.

Хив райондин Хив гъулаъ райондин аьхю серенжем гъабхьну. Душваъ Хив райондин имам Шябан Салихов, Хив райондин глава Ярмет Ярметов, Сулейман Стlал райондин имам Гьясан Амаханов ва гь.ж иштирак гъахьну.

Му серенжем кlули гъабхурайи Аьгьмад Евпатовди уч духьнайидарин арайиъ Пайгъамбарин ﷺ уьмрикан вуйи суалар туври конкурсра тешкил гъапlну. Конкурсдин натижйириз гъилигиган, уч духьнайидариз Пайгъамбарин ﷺ уьмрикан вуйи ужудар аьгъювалар айивал улупнийи.

Гъит Аллагьу Тааьлайи ухьуз мицдар мажлисариъ иштирак хьуз, Пайгъамбар ﷺ ккун апlуз, Аллагьу Тааьла зикир апlуз, гьякьлу рякъ бисуз тавфикьвал туври.

Гьарсар касдин гележег акуб ибшри, алдабгъу лик ягъурлуб ибшри! Амин!

Дагъ. Огни шагьур

Огни шагьрин цlийиди тикмиш дапlнайи жвуми мистан улихь варишагьрин аьхю мавлид ан-Наби кlули гъубшну.

Му серенжемдиъ думу мистан имам, муфтиятдин фетвйир адагъру отделин руководитель Мугьяммад-Рамазан Ражабов, диндин илмарин доктор Рашид Аьлимурадов, Хазар гъулан имам Кьурбан Рамазанов ва гь.ж иштирак гъахьну. Пайгъамбарихъди ﷺ , дугъан асгьябарихъди, гьякьлу мусурмнарихъди аьлакьалу вуйи гьядисйир кдитури, Пайгъамбарин ﷺ тяриф хъапlри, му серенжем кlули гъабшну.

Мушваъ иштирак гъахьидар чпин хулариз лап шадди хътакну. Гьаз гъапиш чпиз аьгъдруб аьгъю гъапlну, Пайгъамьарин ﷺ тяриф гъапlну, хъа думутlан ужуб фу ахъа?!

Гьаддиз, гьюрматлу ватанагьлийир, мавлидар апlуз хай шулдар кlуру инсанарихьан ярхла йихьай, дурар я чпи, ясана жарари Пайгъамбарин ﷺ тяриф дапlну ккуни агьлар дар. Дурарихъанмина халкьдин арайиъ футна гизаф шула.

Гъит Аллагьу Тааьлайи ухьуз Пайгъамбарин ﷺ сирайикан ктибтуз, ужувлан ляхнарикан улхуз, чlурубдихьан ярхла хьуз кюмек туври.

АНСАР РАМАЗАНОВ